आरोग्य सांभाळा! मराठवाड्यात गारठा वाढला, या 2 जिल्ह्यांत सर्वात कमी तापमान

राज्यातील हवामानात सातत्याने बदल होत आहेत. पुढील काही दिवस थंडीचा जोर वाढणार आहे. मराठवाड्यातील तापमानातही मोठी घट झाली असून गारठा वाढला आहे.

मराठवाड्यातील तापमानाचा पारा चांगलाच घसरला असून काही ठिकाणी 13 अंश सेल्सिअस किमान तापमानाची नोंद झालीये. आज परभणी आणि बीड जिल्ह्यामध्ये सर्वात कमी तापमान तापमान 14 अंश सेल्सिअस एवढं असेल.

छत्रपती संभाजीनगरमध्ये पारा 15 अंशांपर्यंत घसरला आहे. तर कमाल तापमान 31 अंशांच्या पार कायम आहे. त्यामुळे पहाटे आणि रात्री थंडी तर दुपारी कडक ऊन जाणवत आहे.

जालना, हिंगोली, लातूर, नांदेड आणि धाराशिव या जिल्ह्यात देखील किमान तापमान 16 अंश सेल्सिअस एवढे असेल. पुढील आठवड्यात तापमानामध्ये अजून घट होण्याची शक्यता हवामान विभागाने वर्तवली आहे.

हवामानातील बदलांच्या पार्श्वभूमीवर शेतकऱ्यांनी आपल्या पिकांची काळजी घेणे गरजेचे आहे. तसेच रब्बी हंगामातील पेरणी शेतकऱ्यांनी लवकर पूर्ण करावी. तसेच आरोग्याची देखील काळजी घेण्याची गरज आहे.