Marathwada Weather Update: ऐन हिवाळ्यात अवकाळी संकट, मराठवाड्यातील या जिल्ह्यांना पावसाचा अलर्ट

राज्यात डिसेंबरच्या पहिल्या दिवसापासूनच हवामानात मोठे बदल जाणवत आहेत. मराठवाड्यात देखील थंडीचा जोर ओसरला असून तापमानात वाढ झालीये. तर ऐन हिवाळ्यात अवकाळी संकटाचा सामना नागरिकांना करावा लागतोय.

मराठवाड्यातील प्रमुख शहर असणाऱ्या छत्रपती संभाजीनगरमध्ये आज किमान तापमान 19 तर कमाल 30 अंश सेल्सिअस राहणार आहे. आज हवामान ढगाळ राहणार असून मुसळधार पावसाची शक्यता आहे. मध्यरात्रीनंतर शहरात पाऊस होईल, असा अंदाज हवामान विभागाने वर्तवला आहे.

परभणी, धाराशिव, लातूर या जिल्ह्यात देखील आज पावसाची शक्यता असून हवामान विभागाकडून अलर्ट देण्यात आला आहे. या जिल्ह्यांतील किमान तापमानात देखील वाढ झाली असून आज ते 21 अंश राहण्याचा अंदाज आहे.

जालना आणि नांदेड या जिल्ह्यात किमान तापमान 22 तर बीड आणि हिंगोलीत 21 अंश सेल्सिअस असेल. आज या सर्व जिल्ह्यांत हवामान ढगाळ राहणार असून काही ठिकाणी अवकाळी पावसाची शक्यता हवामान विभागाने वर्तवली आहे.

पुढील काही दिवस मराठवाड्यात हवामानाची हिच स्थिती कायम राहण्याची शक्यता आहे. त्यामुळे शेतकऱ्यांना आपल्या पिकांची योग्य ती काळजी घ्यावी लागेल. डिसेंबरच्या दुसऱ्या आठवड्यात मात्र हे चित्र बदलणार असून पुन्हा गारठा वाढण्याचा अंदाज आहे.