दिवाळीत पावसाची आतषबाजी? मराठवाड्यासाठी हवामान विभागाचं महत्त्वाचं अपडेट

राज्यात 29 ते 31 ऑक्टोबरदरम्यान काही ठिकाणी पावसाचा अंदाज आहे. यात मराठवाड्यातील जिल्ह्यांचा देखील समावेश आहे. त्यामुळे ऐन फटाक्यांच्या मोसमात पावसाची आतषबाजी नागरिकांना अनुभवावी लागणार आहे.

आज 29 रोजी छत्रपती संभाजीनगर, परभणी, हिंगोली, जालना या जिल्ह्यांत तुरळक ठिकाणी वादळी वाऱ्यासह पावसाची शक्यता आहे.  या ठिकाणी हवामान विभागाने यलो अलर्ट दिला आहे.

बीड, नांदेड, धाराशीव या जिल्ह्यांमध्ये हलक्या ते मध्यम स्वरुपाचा पाऊस राहील, असा अंदाज हवामान विभागाने वर्तवला आहे. तर उद्या, 30 ऑक्टोबर रोजी देखील याठिकाणी जोरदार पावसाची शक्यता आहे.

मराठवाड्यात सकाळी थंडी, दुपारी ऊन आणि पाऊस असं विचित्र वातावरण अनुभवास येत आहे. आज देखील पावसाची शक्यता वर्तवण्यात आलीये. तर शहराचे कमाल तापमान आज 33 अंश सेल्सिअस तर किमान तापमान 21 अंश सेल्सिअस एवढं असेल.

दरम्यान, मराठवाड्यात पुन्हा पाऊस झाल्यास त्याचा शेतकऱ्यांना मोठा फटका बसणार आहे. विशेष करून फळबागांचं नुकसान होण्याची शक्यता आहे. त्यामुळे शेतकऱ्यांना योग्य ती काळजी घ्यावी लागेल.