विदर्भाला हुडहुडी! भंडारा, गोंदियात पारा घसरला, तुमच्या जिल्ह्यात काय स्थिती?

विदर्भात पुढील काही दिवस कुठेही पावसाची शक्यता नाही. आज 23 नोव्हेंबरला विदर्भातील तुरळक ठिकाणी धुक्यासह ढगाळ आकाश असणार आहे. तर काही ठिकाणी स्वच्छ सूर्यप्रकाश बघायला मिळणार आहे.

नागपूर, वर्धा, बुलढाणा, चंद्रपूर, वाशिम यवतमाळ या जिल्ह्यातील किमान तापमान हे 15 अंश सेल्सिअस इतके असेल. दोन दिवस आधी या जिल्ह्यातील किमान तापमानाचा पारा 13 ते 14 अंश सेल्सिअस वर घसरला होता. आता मात्र किमान तापमानात वाढ झालेली दिसून येत आहे.

अमरावती, अकोला या दोन जिल्ह्यातील किमान तापमान 16 अंश सेल्सिअस इतके आहे. या जिल्ह्यातील किमान तापमान देखील दोन दिवसाआधी 13 ते 14 अंश सेल्सिअस इतके होते. आता यात सुद्धा वाढ झालेली दिसून येत आहे. त्यामुळे येथील नागरिकांना आता थंडीचा जोर कमी वाटेल.

गोंदिया, भंडारा, गडचिरोली या सर्व जिल्ह्यातील किमान तापमान 13 ते 14 अंश सेल्सिअस इतके आहे. या जिल्ह्यातील तापमानात सर्वाधिक घट झाल्याचे दिसून येत आहे. गोंदिया, भंडारा या दोन जिल्ह्यातील थंडीचा जोर कायम आहे. त्यामुळे नागरिकांनी आता आरोग्याची काळजी घेणे आवश्यक आहे.

विदर्भातील सर्वच जिल्ह्यांमध्ये दोन दिवस आधी तापमानात घट झाली होती. काही जिल्ह्यांत ती घट कायम आहे. पण काही जिल्ह्यांत किमान तापमानात पुन्हा घट झाली आहे. अमरावती, वर्धा, बुलढाणा, वाशिम या जिल्ह्यांत निरभ्र आकाश असणार आहे. इतर जिल्ह्यांत ढगाळ वातावरण असेल. त्यामुळे शेतकऱ्यांना पिकांची काळजी घ्यावी लागेल.