Weather Alert: शेकोट्या पेटल्या! पश्चिम महाराष्ट्रात पारा घसरला, पुणे ते कोल्हापूर आजचं हवामान अपडेट

उत्तरेकडील थंड वाऱ्यांनी महाराष्ट्रावर स्वारी केल्याने राज्यात हुडहुडी वाढली आहे. मध्य महाराष्ट्र आणि मराठवाड्यात काही ठिकाणी किमान तापमान 10 अंशाच्या खाली घसरल्याने बहुतांश भागात थंडीची लाट आली आहे. आज राज्यात मुख्यतः कोरड्या हवामानासह गारठा कायम राहण्याची शक्यता हवामान विभागाने वर्तविली आहे. पश्चिम महाराष्ट्रातील हवामान अपडेट जाणून घेऊ.

पुणे जिल्ह्यात सोमवारी 29.4 कमाल आणि 13.2 अंश सेल्सिअस किमान तापमानाचा पारा नोंदविण्यात आला. आज पुणे जिल्ह्यातील कमाल तापमान 30 अंशावर राहिल. तसेच किमान तापमान पारा 12 अंशापर्यंत घटणार असल्याने पुढील तीन दिवस पुण्यात थंडीचा कडाका जाणवणार आहे.

साताऱ्यात गारठा वाढत असून, धुक्यासह दव पडत आहेत. सोमवारी साताऱ्यातील कमाल तापमानाचा पारा 30.6 अंशावर राहिला. तर 13.6 अंश सेल्सिअस किमान तापमान राहिले. आज सातारा जिल्ह्यात किमान आणि कमाल तापमानात अंशत: वाढ होऊन 15 ते 31 अंश सेल्सिअस दरम्यान राहिल.

कोल्हापूरकरांच्या दिवसाची सुरुवात साधारण 18 अंश सेल्सिअसच्या किमान तापमानाने होईल. जसजसा दिवस पुढे जाईल तसतसे कमाल तापमान 31 अंश सेल्सिअसवर जाण्याची शक्यता आहे. सकाळी थंडी तर दुपारी चटका आणि उकाडा अशी स्थिती अनुभवायला मिळत आहे.

सोलापूर जिल्ह्यात कमाल तापमानात अंशत: चढ-उतार होत आहेत. सोमवारी 32.2 अंश सेल्सिअस कमाल तापमानाची नोंद झाली. आज कमाल तापमानात अंशत: वाढ होऊन पारा 33 अंशावर राहिल. मात्र किमान तापमानाचा पारा 15 अंशापर्यंत घसरता राहिल. सोलापूरमध्ये दुपारच्या वेळी उन्हाचा चटका कायम आहे.

सांगली जिल्ह्यात मागील 24 तासात 29.8 अंश सेल्सिअस कमाल तापमानाची नोंद झाली. आज जिल्ह्यात दिवसभर निरभ्र आकाशासह कमाल तापमान 32 अंशावर राहिल. तसेच किमान तापमान 15 अंशावर राहिल. सांगलीत पहाटे थंडीचा कडाका आणि दुपारी उन्हाचा चटका अशी स्थिती राहील.

राज्यात गारठा वाढत असून, पहाटे धुक्यासह दव पडल्याचे चित्र कायम आहे. पश्चिम महाराष्ट्रातील काही जिल्ह्यांत किमान तापमानात चढ-उतार होत आहेत. मात्र थंडीचा कडाका कायम राहण्याची शक्यता हवामान विभागाने वर्तविली आहे. पहाटे थंडी, दुपारी कडक ऊन आणि रात्री परत गारठा जाणवत असल्याने नागरिकांनी आरोग्याची काळजी घ्यावी.