कुंभ राशीच्या व्यक्तींना कधी मिळणार साडेसातीपासून मुक्ती? शनीच्या पीडेपासून दिलासा मिळण्यासाठी हे आहेत उपाय

ज्योतिषशास्त्रात शनीला कर्म आणि न्यायाचा स्वामी मानलं जातं. साडेसाती किंवा अडीचकी म्हटलं की प्रत्येक जण भयभीत होतो. कारण या कालावधीत व्यक्तीच्या जीवनात मोठी उलथापालथ पाहायला मिळते. सध्या शनी कुंभ या स्वराशीत गोचर करत आहे. त्यामुळे अर्थातच कुंभ राशीला साडेसाती आहे. कुंभ राशीची साडेसाती कधी संपणार आहे, साडेसातीची तीव्रता कमी होण्यासाठी या राशीच्या व्यक्तींनी कोणते उपाय करावेत.

साडेसातीमध्ये शनी संबंधित व्यक्तींना शारीरिक, मानसिक आणि आर्थिक पीडा देतो. दुर्घटना घडू शकतात. पैशांची टंचाई, आरोग्याच्या समस्यांचा सामना करावा लागू शकतो. साडेसातीत त्रास कमी व्हावा यासाठी रोज सकाळी भगवान शंकराला गंगाजलाने अभिषेक करावा. मंगळवार आणि शनिवारी श्री हनुमानाची पूजा करावी. हनुमान चालिसा पठण करावी. भगवान शंकर आणि श्री हनुमानाच्या भक्तांना शनी पीडा देत नाही.

दर शनिवारी शमीच्या वृक्षाला पाण्याने अर्घ्य द्यावं. संध्याकाळी शमी किंवा पिंपळाच्या झाडाखाली मोहरीच्या तेलाचा दिवा लावावा. शनिस्तोत्र पठण करावं. शनिवारी पूजा झाल्यावर काळे उडीद, काळे तीळ, चामड्याच्या चपला दान कराव्यात.

शनीची साडेसाती साडेसात वर्षं असते. साडेसातीत अडीच वर्षांचे तीन टप्पे असतात. सध्या कुंभ राशीला साडेसातीचा दुसरा टप्पा सुरू आहे. 2025मध्ये शनी मीन राशीत गोचर करील तेव्हा कुंभ राशीचा दुसरा टप्पा संपेल आणि तिसरा टप्पा सुरू होईल. 29 मार्च 2025 ते 3 जून 2027 पर्यंत शनी मीन राशीत असेल. तोपर्यंत कुंभ राशीला साडेसाती असेल. त्यानंतर कुंभ रास साडेसातीतून मुक्त होईल. कुंभ राशीच्या व्यक्तींसाठी चांगली बाब म्हणजे ही शनीची रास आहे. त्यामुळे शनी महाराज या राशीला कमी त्रास देतात. ज्या व्यक्ती चांगलं कर्म करतात त्यांना ते शुभ फळं देतात. तसंच शनीच्या साडेसातीचा तिसरा टप्पा कमी त्रासदायक असतो.

(सूचना : येथे दिलेली माहिती धार्मिक श्रद्धेवर आधारित आहे. याला कोणताही शास्त्रीय पुरावा नाही. न्यूज 18 मराठी त्याची हमी देत नाही.)