Baba Siddique Murder : बंदुकीच्या गोळीने मृत्यू कसा होतो? बुलेट शरीरात घुसल्यावर असं काय होतं?

अत्यंत प्राणघातक शस्त्रात बंदुकीचा समावेश होतो. बंदुकीची गोळी लागल्यावर माणूस गंभीर जखमी होतो आणि मृत्यूही होतो. बंदुकीचा परिणाम कसा होईल हे बंदुकीचा प्रकार, बुलेटचा आकार, वेग यावरही त्याचा परिणाम अवलंबून आहे.

बंदुकीच्या गोळीत विषारी पावडर असते, ते पेटून स्फोट होतो या विषारी पावडरमध्ये शरीर पोळून, जाळून काढण्याची क्षमता असते. बंदुकीची गोळी अत्यंत वेगाने शरीरात घुसते, तो अवयवसुद्धा फुटतो. तिथल्या रक्तवाहिन्या फाटतात आणि रक्तस्राव सुरू होतो.  रक्तस्राव वेळीच न थांबवल्यास स्थिती अधिक गंभीर होते.

गोळी बोगद्यासारखा रस्ता बनवून शरीरात प्रवेश करते. आपल्या मार्गात येणारी प्रत्येक गोष्ट नष्ट करत जाते. रक्तवाहिन्या असोत किंवा मोठ्या नलिका, गोळी प्रत्येक गोष्टीचं वाईट प्रकारे नुकसान करत आत जाते. गोळीच्या मार्गात एखादं हाड आडवं आलं तर साहजिकच त्यालाही दुखापत होते.

गोळी आत गेल्यावर शरीरात एक पातळ छिद्र पडतं. ते मोठं होऊ लागतं आणि त्या बोगद्याच्या आसपासचे अवयव, ऊती, पेशी आणि रक्तवाहिन्या अधिक प्रभावित होऊ लागतात. रक्तस्राव वाढतो.

गोळीमध्ये शिसं आणि कॅल्शियम सिलिकेटसारखे बरेच जड धातू असतात. कधीकधी न जळलेली गन पावडरदेखील गोळीला चिकटलेली असते. हे घटक शरीरात विष पसरवण्याचं काम करतात. जसजसा वेळ जातो तसतशी परिस्थिती गंभीर होत जाते. काही वेळा गोळी लागल्यानंतर जास्त रक्तस्रावदेखील मृत्यूला कारणीभूत ठरतो.

हात, पाय किंवा एखाद्या बाह्य अवयवातून गोळी गेल्यास व्यक्ती जगण्याची शक्यता जास्त असते. हात-पायांमध्ये गोळी लागल्यावर उपचारांसाठी काही तासांचा विलंब झाला तरी व्यक्ती जिवंत राहण्याची शक्यता असते.

पण शरीराचे काही भाग असे असतात की जिथे गोळी लागणं धोकादायक ठरतं. महत्त्वाच्या अवयवांमध्ये हृदय, मेंदू, किडनी, लिव्हर आणि छातीभोवती असलेल्या जाड रक्तवाहिन्यांचा समावेश होतो. तिथे गोळी लागल्यानंतर काही मिनिटांत उपचार सुरू केले नाहीत, तर जीवघेणी स्थिती उद्भवू शकते. मेंदू आणि हृदयात गोळी लागल्याने लगेच मृत्यू होतो.