वसई – एकेकाळी नोकरी करत असलेल्या तृप्ती दहीवाले यांनी आज स्वतःच्या मेहनती, चिकाटी आणि आत्मविश्वासाच्या जोरावर ज्वेलरी व्यवसायात मोठं यश मिळवलं आहे. ज्वेलरी डिझाईनचा कोर्स करून काही काळ नोकरी केल्यानंतर तृप्तींच्या मनात सतत स्वतःचं काहीतरी करण्याची ओढ होती. सुरक्षित नोकरी सोडून थेट व्यवसायात उडी घेताना त्यांना अनेक अडचणींचा सामना करावा लागला. अनेकांनी नकारात्मक प्रतिक्रिया दिल्या – “नका करू, फारसं चालत नाही” असे सल्ले देण्यात आले. पण तृप्तीने हार मानली नाही. त्यांच्या सरांनी एकदा सांगितलेलं वाक्य त्यांच्या मनात ठसलं – “Change is pain. चेंज आला की पेन होतोच, पण त्यातूनच यश मिळतं.” या शब्दांनी त्यांना धैर्य दिलं आणि त्या संघर्ष पेलत पुढे चालत राहिल्या. आज तृप्ती दहीवाले यांचा स्वतःचा ज्वेलरी शॉप आहे. त्यांच्या दागिन्यांची महिन्याला लाखोंची उलाढाल होते आणि संपूर्ण महाराष्ट्रभर ग्राहकांचा भरभरून प्रतिसाद मिळतो. त्यांच्या ब्रँडने गुणवत्ता आणि विश्वासार्हतेचा परिपाठ प्रस्थापित केला आहे. तृप्ती सांगतात – “घरच्यांचा सपोर्ट नसता तर हे शक्य झालं नसतं.” त्या सर्व नवउद्योजक महिलांना संदेश देतात – “हो, व्यवसायात रिस्क असतो, अडचणी येतात, पण त्यानंतर जे समाधान मिळतं ते अमूल्य असतं. त्यामुळे भीऊ नका, धाडस करा. तुम्ही यशस्वी होणारच.” तृप्तींचा हा प्रवास आजच्या तरुणाईला आणि महिलांना शिकवतो की धैर्य, मेहनत आणि चिकाटीने कोणतंही स्वप्न साकार करता येतं.
