Astrology: खूप वर्षे स्पर्धा परीक्षांची तयारी! पण अधिकारी, IAS-IPS होण्यासाठी कुंडलीत असा योग जुळून येणे पूरक

प्रशासकीय अधिकारी होण्यासाठी कुंडलीतले सूर्य आणि मंगळ हे दोन ग्रह खूप बलवान असावे लागतात. सूर्य हा सत्तेचा आणि अधिकाराचा कारक आहे, जो आयएएस पदासाठी आवश्यक असतो. तर मंगळ हा शिस्त आणि धैर्याचा कारक असल्याने आयपीएस पदासाठी महत्त्वाचा मानला जातो. याचसोबत कुंडलीतलं पहिलं घर म्हणजेच लग्न स्थान आणि नववं भाग्य स्थान मजबूत असेल तर व्यक्तीची इच्छाशक्ती दांडगी राहते. तिसरं घर धाडस दाखवतं, तर चौथं आणि पाचवं घर जनतेशी असलेलं नातं आणि बुद्धिमत्ता दर्शवतं.

सगळ्यात महत्त्वाचं स्थान म्हणजे कुंडलीतलं दहावं घर. हे घर राज्य आणि उच्च पदांशी संबंधित असतं. जर या घराचा स्वामी शुभ ग्रहांच्या प्रभावात असेल, तर सरकारी अधिकारी होण्याची शक्यता खूप वाढते. सूर्य जर दहाव्या किंवा नवव्या घरात असेल आणि तो स्वतःच्या किंवा मित्र राशीत असेल, तर त्या व्यक्तीमध्ये नेतृत्व करण्याचे गुण उपजतच असतात. याउलट सूर्य जर सहाव्या, आठव्या किंवा बाराव्या घरात असेल किंवा त्यावर राहू-केतूचा प्रभाव असेल, तर सरकारी नोकरी मिळवण्यात अडचणी येऊ शकतात.

केवळ पद मिळवणं महत्त्वाचं नसतं, तर ते टिकवून ठेवण्यासाठी शनीची साथ लागते. शनि हा शिस्त आणि कष्टाचा ग्रह आहे. जर कुंडलीत शनीची स्थिती चांगली असेल तरच व्यक्ती दीर्घकाळ पदावर टिकून राहू शकते. पोलिसात जाण्यासाठी मंगळ, शिक्षणासाठी गुरु आणि उत्तम भाषणासाठी बुधाची साथ गरजेची असते.

आपल्यापैका कोणाला प्रशासकीय सेवेत जाण्याची इच्छा असेल तर सूर्य देवाला प्रसन्न करणं फायदेशीर ठरू शकतं. यासाठी रविवारी मिठाशिवाय उपवास करणं, दररोज सूर्याला पाणी अर्पण करणं आणि सूर्य चालीसा वाचणं हे उपाय सांगितले जातात. आपल्या वडिलांचा आणि शिक्षकांचा आदर केल्यानेही सूर्याचं बळ वाढतं. अंगात पांढरे किंवा केशरी कपडे घालणं आणि गरजूंना दान देणं या गोष्टींमुळेही ग्रहांची अनुकूलता वाढायला मदत होते.