Shaniwar Puja: अश्वत्थ मारुती पूजनाचे धार्मिक महत्त्व; श्रावण शनिवारी अशा पद्धतीनं केले जातात विधी

पिंपळाचे धार्मिक महत्त्व: पिंपळाच्या झाडात देवतांचा वास असतो, अशी श्रद्धा आहे. याच्या मुळात ब्रह्मदेव, खोडात विष्णू आणि पानांमध्ये भगवान शिव वास करतात असे मानले जाते. त्यामुळे पिंपळाची पूजा म्हणजे साक्षात त्रिदेवतांची पूजा मानली जाते. तर मारुतीराया संकटमोचक आहे. अश्वत्थाखाली त्यांची पूजा केल्याने सर्व संकटे दूर होतात, भीती आणि नकारात्मक ऊर्जा नष्ट होते, अशी श्रद्धा आहे. अश्वत्थ मारुती पूजन केल्याने आरोग्य लाभतो, आर्थिक अडचणी दूर होतात आणि घरात सुख-समृद्धी येते असे मानले जाते.

अभिषेक आणि पूजा :  मारुतीच्या मूर्तीवर शुद्ध पाणी अर्पण करावे. मूर्तीला शेंदूर आणि तेलाचे मिश्रण (तेल-शेंदूर) लेपून पूजा करावी. याला तेल-सिंदूर अर्पण करणे असे म्हणतात. त्यानंतर हळद-कुंकू, अक्षता आणि फुले अर्पण करावीत. मारुतीरायांची आरती करावी.

'ॐ हनुमते नमः' या मंत्राचा किंवा हनुमान चालीसा किंवा बजरंग बाण यांचे पठण करावे. मारुतीरायांना आपली समस्या सांगून ती दूर करण्याची प्रार्थना करावी. नैवेद्य अर्पण करावा. शेवटी, पिंपळाच्या झाडाला ७, ११, २१ किंवा १०८ प्रदक्षिणा घालाव्यात. प्रदक्षिणा घालताना 'ॐ शं शनैश्चराय नमः' किंवा हनुमानाच्या मंत्राचा जप करावा. पिंपळाच्या झाडाला पाणी अर्पण करताना झाडाला स्पर्श करू नये. सायंकाळी सूर्यास्तानंतर पिंपळाच्या झाडाखाली दिवा लावणे अधिक शुभ मानले जाते. या पूजनामुळे मारुतीच्या कृपेने तुमच्या जीवनातील अडचणी दूर होतात आणि शनिदोषामुळे होणारा त्रासही कमी होतो, अशी धार्मिक श्रद्धा आहे.

(सूचना : येथे दिलेली माहिती ज्योतिषीय ज्ञानावर आधारित आहे. याला कोणताही शास्त्रीय पुरावा नाही. न्यूज 18 मराठी त्याची हमी देत नाही.)