पाहुणा म्हणून आला अन् डाका टाकून गेला; आत्याच्या पोरानेच केली घरफोडी, 11 लाखांच्या दागिन्यांवर डल्ला!

आदित्य सुनील भोसले (वय २२, रा. धर्मवीर संभाजी कॉलनी, शाहूपुरी) यांनी याप्रकरणी पोलिसांत तक्रार दाखल केली होती. आदित्यची आई आणि आजी यांनी त्यांचे सोन्याचे दागिने एका कपाटात ठेवले होते. त्यामध्ये 29 ग्रॅम सोन्याचे मंगळसूत्र, 26 ग्रॅमच्या दोन बांगड्या, 14 ग्रॅमची बोरमाळ, पाच ग्रॅमची अंगठी, 39 ग्रॅमचे मंगळसूत्र व सात ग्रॅमची कर्णफुले व वेल, अशा दागिन्यांचा समावेश होता.

31 ऑगस्ट रोजी गौरीला दागिने घालण्यासाठी त्यांनी कपाट उघडले, तेव्हा त्यांना दागिने जागेवर नसल्याचे दिसून आले. त्यांनी तात्काळ शाहूपुरी पोलिसांत तक्रार दिली. पोलिसांनी तपास सुरू केला असता, ऋषिकेश हा गेल्या काही दिवसांत दोन वेळा त्यांच्या घरी येऊन गेल्याची माहिती मिळाली. पोलिसांनी परिसरातील सीसीटीव्ही फुटेज तपासले. त्यात ऋषिकेशवर संशय बळावला. पोलिसांनी त्याला ताब्यात घेऊन चौकशी केली असता, त्यानेच चोरी केल्याची कबुली दिली.