बीड: परळीतील 'फड गँग'च्या नांग्या ठेचल्या, वाल्मीकच्या आणखी एका टोळीवर मोक्का

रघुनाथ फड गँगने २०२३ मध्ये केलेल्या गुन्ह्यात अलीकडेच १ मार्च २०२५ रोजी गुन्हा दाखल केला होता. न्यायालयाच्या आदेशावरून परळी शहर पोलीस ठाण्यात हा गुन्हा दाखल झाला होता. सहदेव सातभाई यांनी याबाबतची तक्रार दिली होती. संबंधित तक्रारीनुसार, १८ ऑक्टोबर २०२३ रोजी तक्रारदार ट्रॅक्टरचा हप्ता भरण्यासाठी २ लाख ७० हजार रुपये घेऊन दुचाकीवरुन जात होते. ते जलालपूर भागात गेले असता फड गँगने रस्त्यात जीप आडवी लावून तक्रारदाराला अडवलं. यावेळी रघुनाथ फड, जगन्नाथ फड, सुदीप सोनवणे, बालाजी दहिफळे, विलास गिते, धनराज उर्फ राजेभाऊ फड आणि ग्यानदेव उर्फ गोट्या गिते यांनी त्यांना रॉडने मारहाण केली होती.

रघुनाथ फड हा फड गँगचा म्होरक्या आहे. गेल्या काही वर्षांपासून या टोळीने परळीसह अंबाजोगाई तालुक्यात मोठी दहशत निर्माण केली आहे. मागील १० वर्षांत या टोळीवर १० गुन्हे नोंद असून ९ गुन्हे न्यायप्रविष्ठ आहेत, तर एका गुन्ह्याचा तपास सध्या सुरू आहे. हे सर्व गुन्हे ३ वर्षांपेक्षा जास्त शिक्षा असलेले आहेत. यामध्ये खुनाचा प्रयत्न, दुखापत, दंगा, अवैध शस्त्र बाळगणे, सरकारी कामात अडथळा, दरोडा, जबरी चोरी, मारहाण, गंभीर दुखापत, रस्ता अडवणे असे गुन्हे आहेत.