'मूलबाळ होत नाही, करावी लागेल पूजा', म्हणत भोंदू बाबांनी शेतकरी दाम्पत्याचे लुटले 22 लाख!

गोविंदपूर येथील शेतकरी महेंद्र निवृत्ती सांबरे (वय-37) यांच्याकडे पाच एकर शेती आहे. जून महिन्यात नंदीबैलाची जोडी घेऊन दोन भामटे त्यांच्या गावात आले. सांबरे यांच्या घरी पोहोचल्यावर त्यांच्या पत्नीने त्यांना मूलबाळ होत नसल्याचे सांगितले. याच गोष्टीचा फायदा घेत भामट्यांनी त्यांना विविध आमिष दाखवले. ‘तुमच्या घरात खूप मोठे सोने आहे, त्यामुळेच तुम्हाला मूलबाळ होत नाही. जर पूजा केली तर घरात सोनेही येईल आणि मूलबाळही होईल,’ असे त्यांनी सांगितले.

नंदीबैलाची जोडी घेऊन आलेल्या या भामट्यांनी मागील दीड महिन्यांपासून सांबरे दाम्पत्याकडून पैसा उकळण्यास सुरुवात केली. सुरुवातीला पूजाविधीसाठी 70 हजार रुपये, नंतर 1 लाख रुपये आणि त्यानंतर तब्बल 21 लाख रुपये मागितले. ही सर्व रक्कम सांबरे यांनी त्यांना दिली. 21 लाख रुपयांची मागणी पूर्ण करण्यासाठी सांबरे यांना आपली पाच एकर शेतीही गहाण ठेवावी लागली.