Govind Barge Pooja Gaikwad: बर्गे मृत्यू प्रकरणात पोलीस तपासात समोर आली धक्कादायक माहिती, वापरलेलं पिस्तूल कोणाचं?

गेवराई तालुक्यातील गोविंद जगन्नाथ बर्गे हे प्लॉटिंगचे व्यवसाय करत होते. या व्यवसात त्यांचा हळूहळू चांगला जम बसायला लागला होता. त्याच दरम्यान त्यांची ओळख पारगाव कलाकेंद्रातील नर्तिका पूजा गायकवाड सोबत झाली होती. त्यानंतर ही ओळख जवळीकमध्ये वाढत गेली आणि या ओळखीचे रुपांतर प्रेमात झाले. मात्र, प्रेमात पूजाने गोविंदकडून पैशांची मागणी सुरू केली होती. त्यानुसार गोविंदने वेळोवेळी पूजाला व तिच्या नातेवाइकांना पैसे, सोन्याचे दागिने दिले. एवढेच नव्हे, तर तिच्या भावासाठी महागडा मोबाईल व बुलेट मोटारसायकल खरेदी केली. तिच्या आईसाठी सासरच्या गावी घर बांधून दिले, तर मावशीसाठी वैराग येथे प्लॉट घेतला. याशिवाय नातेवाइकांच्या नावावर तीन एकर शेतीही विकत घेतली होती. मात्र, या सर्व गोष्टी असूनही पूजाच्या अपेक्षा वाढतच गेल्या. सततच्या दबावामुळे आणि वाढत्या तणावाखाली अखेर बर्गे यांनी आत्महत्येचे टोक गाठले.

सरकारी वकिलांनी न्यायालयात युक्तिवाद करताना गायकवाडविरोधात अनेक गंभीर मुद्दे मांडले. पोलिसांनी न्यायालयाकडे सीडीआर (कॉल डिटेल रेकॉर्ड) तपासण्यासाठी, बँक खात्यांतील व्यवहारांचे विश्लेषण करण्यासाठी तसेच आर्थिक बाबींचा मागोवा घेण्यासाठी कोठडीची आवश्यकता असल्याचे सांगितले. याशिवाय, गायकवाडने यापूर्वी इतर कुणाला फसवले आहे का, याचाही तपास सुरू आहे.

गोविंद बर्गे यांनी आत्महत्या करण्यासाठी वापरलेले पिस्तूल त्यांच्याच मालकीचे नसल्याचे तपासातून उघड झाले आहे. संबंधित शस्त्र त्यांनी दुसऱ्याकडून खरेदी केल्याचे निष्पन्न झाले आहे. यासंबंधी पत्रव्यवहार सुरू असल्याची माहिती पोलिसांनी दिली. या प्रकरणामुळे वैराग परिसरात मोठी खळबळ उडाली आहे. पुढील चौकशीतून आणखी धक्कादायक बाबी समोर येण्याची शक्यता पोलिसांनी वर्तवली आहे.