मामाने टीप दिली अन् भाच्याने केला कांड, मालकासोबत घडला विचित्र प्रकार

मामा रामा राऊत, भाचा राजेश पवार आणि त्याचा मित्र प्रतीक शेळके असं अटक केलेल्या आरोपींची नावं आहेत. तर प्रभाकर देशमुख असं लूट झालेल्या व्यक्तीचं नाव आहे. पोलिसांनी दिलेल्या माहितीनुसार, आरोपी रामा राऊत हा प्रभाकर देशमुख यांच्याकडे चालक म्हणून काम करतो. घटनेच्या दिवशी बुधवारी, ४ जून रोजी दुपारी हिंगोली येथील प्रभाकर देशमुख हे त्यांचा चालक रामा राऊत याच्यासोबत दुचाकीवरून सेनगाव येथून हिंगोलीकडे जात होते.

दरम्यान, ब्रह्मपुरी पाटीजवळ दुसऱ्या दुचाकीवर आलेल्या दोघांनी त्यांची दुचाकी अडवली. आरोपींनी देशमुख यांना धमकी देत त्यांच्या हातातील दोन लाख रुपये असलेली बॅग आणि मोबाईल हिसकावून पळ काढला. या घटनेनंतर पोलिसांनी तत्काळ तपास सुरू केला. पोलिसांनी सर्वात आधी चालक रामा राऊत याचा शोध घेऊन त्याची चौकशी केली. पोलिसांच्या प्रश्नांच्या भडीमारामुळे रामा गडबडला आणि त्याने गुन्ह्याची कबुली दिली. त्याने आपला भाचा राजेश पवार याला प्रभाकर देशमुख यांच्याकडे पैसे असल्याची टीप दिली होती.

रामाच्या कबुली जबाबानुसार, राजेश पवार आणि त्याचा मित्र प्रतीक शेळके यांनी ही लूट केल्याचे समोर आले. पोलिसांनी तत्काळ राजेश पवार आणि प्रतीक शेळके यांना ताब्यात घेतले. चौकशीअंती त्यांनीही गुन्ह्याची कबुली दिली. पोलिसांनी मामा, भाचा आणि त्यांच्या साथीदाराला अटक केली असून पुढील तपास सुरू आहे.