'स्टँडवर भावाची स्कूटी, रक्त सांडलं होतं', आकाशच्या बहिणीने सांगितला थरकाप उडवणारा प्रसंग

प्रियंकाने पोलिसांना दिलेल्या जबाबात सांगितलं की, ४ जून रोजी दुपारी साडेबाराच्या सुमारास माझा लहान भाऊ आकाश कैलास मोरे घरी जेवन करून बाहेर गेला होता. त्यानंतर दुपारी साडेतीन वाजता तो घरी परत आला आणि घरात झोपला. त्यावेळी आम्ही सर्वजण घरातच होतो. सायंकाळी सहाच्या सुमारास झोपेतून उठल्यानंतर आकाश स्कुटीवरून एकटाच बाहेर गेला. त्यानंतर सायंकाळी साडे सहाच्या सुमारास आमच्या गल्लीत चर्चा झाली की, माझा भाऊ आकाशला गोळ्या घातल्या आहेत.

मी लगेच बसस्टॅन्डकडे पळत गेली. बसस्टॅन्डवर आकाशची स्कुटी पडली होती. बाजुला चप्पल होती. त्याबाजुला रक्तही पडलेले होते. तिथे गेल्यानंतर मला समजलं की, आकाशला सरकारी दवाखान्यात घेवून गेले आहेत. म्हणुन मी पुन्हा सरकारी दवाखाना पाचोरा येथे आले. त्याठिकाणी वार्ड मधील पलंगावर आकाशचे प्रेत ठेवलेले होते. ते मी पाहिले. पण लोकांनी मला जवळ जाऊ दिलं नाही.

आमच्या गल्लीत राहणारा प्रथमेश उर्फ गण्या सुनिल लांडगे आणि त्याचा मित्र निलेश उर्फ राव अनिल सोनवणे हे मागील एक महिन्यांपासून माझ्या भावाला खुन्नस देत होते. आणि रागाने पाहत होते. त्या दोघांनी माझ्या भावाला जीवे मारण्याची धमकी दिली होती. याबाबत भावाने आपल्याला सांगितलं होतं. असंही प्रियंकाने पोलीस जबाबात सांगितलं.

मयत आकाश मोरे याने दोन दिवसांपूर्वी इन्स्टाग्रामवर एक व्हिडिओ पोस्ट केला होता. त्यात तो म्हणतो – "शेठ, तुम्ही हवेत गोळ्या मारता, आम्ही थेट छातीवर मारतो, रोख ठोक. जिस दिन मारुंगा छाती पे मारुंगा, या स्टेटसनंतर काहीच तासांत हा जीवघेणा हल्ला झाल्याने ही हत्या वर्चस्ववादातून झाली का? याचाही तपास पोलीस करत आहेत.

मयत आकाश हा कुशल सेंट्रिंग कारागीर होता. मात्र गेल्या काही काळापासून तो वाळूचे काम करायचा. वाळू व्यवसायाच्या वादातून ही घटना घडल्याची प्राथमिक माहिती पुढे आली आहे. आकाश मोरे हा अविवाहित होता. त्याच्या पश्चात वडील एक भाऊ एक बहीण असा परिवार आहे. पोलिसांनी आरोपी निलेश सोनवणे आणि एक अल्पवयीन मुलाकडून दुचाकी दोन पिस्तूल दोन मोबाईल जप्त केले आहेत. तसेच दुचाकीच्या वादातून आम्ही गोळीबार केला, अशी प्राथमिक माहिती आरोपींनी पोलिसांना दिल्याची माहिती देखील समोर आली आहे.