Raja Raghuwanshi Case : अखेर राजने पोलिसांसमोर तोंड उघडलं, सोनमच्या भावाचं कनेक्शन समोर, राजा रघुवंशी प्रकरणात नवा ट्वीस्ट

मध्य प्रदेशातील इंदूरमधील जोडपं राजा रघुवंशी आणि सोनम रघुवंशी हे हनिमूनसाठी मेघालयात गेले होते. मात्र, त्या ठिकाणी राजाची हत्या सोनम आणि इतर आरोपींनी कट रचून केली. मेघालय पोलिसांनी या हत्येच्या कटाचा उलगडा केला. आता शिलाँग पोलिसांकडून या आरोपींची कसून चौकशी सुरू आहे.

राजा हत्या प्रकरणात हवाला आणि काळ्या पैशाचे कनेक्शन समोर आले होते. ही माहिती समोर आल्यानंतर प्रकरणाला वेगळंच वळण मिळाले. आता या प्रकरणात सोनमचा भाऊ गोविंदवर संशयाची सुई फिरू लागली आहे. इंदूर गुन्हे शाखेने अचानक गोविंदला चौकशीसाठी बोलावले. शिलाँग पोलिस राजा हत्याकांडाचा तपास करत असले तरी, इंदूर गुन्हे शाखेने आरोपी राज कुशवाहा याला बडा बांगरडा येथील सोनमच्या दुसऱ्या गोदामातून ताब्यात घेतले. तेव्हा त्याने तेथील हवाला व्यवसायाची माहिती दिली होती.

त्यानंतर, इंदूर पोलिसांच्या वरिष्ठ अधिकाऱ्यांनी राजच्या मोबाईलची तपासणी केली तेव्हा त्यात अनेक मोठ्या हवाला व्यापाऱ्यांशी त्याच्या संपर्काचे पुरावे देखील सापडले. मोबाईलमध्ये हवाला कोड शब्द देखील सापडले आहेत. पोलिसांनी या मुद्यावर स्वतःहून कोणताही तपास केला नाही.

दुसरीकडे, सूत्रांनुसार, जेव्हा सोनमच्या सूचनेनुसार राजचे मित्र राजाला मारण्यासाठी ट्रेनने इंदूरहून निघाले तेव्हा राजने काही मिनिटांतच त्यांच्याकडे 50 हजार रुपये आणि 2 मोबाईल फोन आणले. हे 50 हजार रुपये पिथमपूरमधील एका हवाला डीलरकडून आणले होते.

शिलाँग पोलिसांचे एक पथक सध्या इंदूरमध्ये तळ ठोकून आहेत. ते सोनमच्या कुटुंबाची चौकशी करत आहेत. तथापि, शुक्रवारी शिलाँग पोलिस अधिकारी चौकशीसाठी कुठेही गेले नाहीत. ते त्यांच्या वरिष्ठ अधिकाऱ्यांशी थेट संबंधात आहेत. शनिवारी ते पुन्हा चौकशीसाठी सोनमच्या घरी पोहोचले.