Vaishnavi Hagawane Death Mystery: 2 नव्हे तर 120 तास टॉर्चर, हत्यारंही शोधायची, पोलिसांच्या दाव्याने गूढ वाढलं

वैष्णवी हगवणेच्या प्रकरणाने राज्यात एकच खळबळ उडाली आहे. या प्रकरणातील आरोपीचे असलेले राजकीय लागेबंध पाहता या प्रकरणाकडे सगळ्या राज्याचे लक्ष लागले आहे. वैष्णवीच्या शरीरावर मारहाणीच्या 30 खुणा आढळल्याचं सांगितलं. यापैकी 15 जखमा आत्महत्या करण्यापूर्वी चोवीस तासांच्या आत असल्याची माहिती याआधीच समोर आली होती. वैष्णवीला सतत सासरच्या लोकांकडून आणि नवऱ्याकडून मारहाण होत असल्याचा आरोप करण्यात येत होता. तिच्या शवविच्छेदन अहवालात मारहाणीच्या जखमांबाबत भाष्य करण्यात आले आहे.

वैष्णवी हगवणे मृत्यू प्रकरणात नवे धक्कादायक तपशील समोर आले आहेत. बुधवारी पोलिसांनी न्यायालयात सांगितले की, पती शशांकने तिच्या मृत्यूपूर्वी पाच व तीन दिवस आधी तिला विविध हत्यारांनी मारहाण केली होती, अशी माहिती तपासात उघड झाली आहे. संबंधित हत्यारे अद्याप पोलिसांच्या ताब्यात आलेली नाहीत. ती जप्त करण्यासाठी पुढील तपास आवश्यक असल्याने पोलिसांनी आरोपींच्या कोठडीत वाढ करण्याची मागणी न्यायालयात केली आहे.

दरम्यान, पाचही आरोपींचे मोबाईल फोन अद्याप पोलिसांच्या ताब्यात आलेले नव्हते. त्यामुळे तपासात अडथळे येत होते. याच कारणास्तव पोलिसांनी न्यायालयात आरोपींच्या कोठडीत वाढ करण्याची विनंती केली होती. जेणेकरून मोबाईलचा शोध घेणे शक्य होईल. पोलिसांना जर आज हे मोबाईल हाती लागले, तर वैष्णवीच्या मृत्यूमागचे अनेक गूढ उकलू शकतात, असे म्हटले जात आहे.

या घडामोडींच्या पार्श्वभूमीवर आणखी एक महत्त्वाची घटना घडली आहे. या प्रकरणातील सहआरोपी निलेश चव्हाण याच्याविरोधात ‘स्टँडिंग वॉरंट’ (Standing Warrant) जारी करण्यात आले आहे. निलेश चव्हाण हा अद्याप फरार आहे. त्याच्या स्थावर आणि जंगम मालमत्तेवर जप्ती आणण्याची प्रक्रिया सुरु करण्यात आली असून, याबाबतची अधिकृत घोषणा आज केली जाण्याची शक्यता आहे.