'तुमची मुलं खराब निघाली तर आम्ही काय करू?' इन्फ्लूएन्सरने सर्वांसमोरच अमिताभ बच्चन यांना विचारला जाब, VIDEO VIRAL

लोकप्रिय शो 'कौन बनेगा करोडपती १७' च्या सेटवर जेव्हा स्टँड-अप कॉमेडीचे दिग्गज दाखल झाले, तेव्हा अमिताभ बच्चन यांच्यासोबत खूप धमाल झाली. कॉमेडियन हर्ष गुजरालने चक्क बिग बींच्या २००३ मधील सुपरहिट चित्रपट 'बागबान' वर कॉमेडी केली आणि अनेक भारतीय मुलांच्या मनातील खदखद नॅशनल टीव्हीवर बोलून दाखवली. हर्षच्या या कॉमेडीमुळे अमिताभही थोडे शॉक झाले.

'बागबान' चित्रपट भारतीय पालकांसाठी त्यांच्या मुलांना ब्लॅकमेल करण्याचे एक सिनेमॅटिक शस्त्र बनले आहे, असे मत हर्ष गुजरालने खुलेपणाने मांडले. आपल्या स्टँड-अप सेगमेंटमध्ये हर्षने थेट अमिताभ बच्चन यांच्याकडे पाहिले आणि विचारले, "सर, तुम्ही तो चित्रपट का केला? भारतात मुलांना फक्त दोनच चित्रपटांची भीती वाटते, ते म्हणजे रात्री 'वीराना' आणि दिवसा 'बागबान'."

हर्षने एका सामान्य मुलाचा अनुभव सांगताना म्हटले, "चित्रपट दाखवायला घेऊन जातानाही आमचे आई-वडील आम्हाला मारायचे. आम्हाला वाटायचे की, त्यांनी अजून चित्रपट पाहिला नाहीये, तरी एवढा मारत आहेत, पाहिल्यावर तर जीवच घेतील!" यावेळी चित्रपटाचा परिणाम कुटुंबांवर कसा झाला, हे हर्षने दाखवून दिले.

हर्ष म्हणाला, "चित्रपट पाहिल्यानंतर माझ्या कुटुंबात 'बागबान'चे युग सुरू झाले. माझ्या वडिलांनी माझ्यावर त्यांच्या संपत्तीवर डोळा ठेवल्याचा आरोप करायला सुरुवात केली, तेव्हा मला त्यांना आठवण करून द्यावी लागली की, 'आपण तर भाड्याच्या घरात राहतो!'" हर्षने मजेत अमिताभ बच्चन यांनाच भारतीय मुलांना वर्षानुवर्षे मिळणाऱ्या वागणुकीसाठी जबाबदार धरले. हर्ष थेट बिग बींना म्हणाला, "चित्रपटात तुमचे चारही मुलं वाईट निघाले, पण आमचा काय दोष? आम्ही इतकी वर्षे त्याची किंमत का मोजत आहोत?"

हर्ष गुजरालने चित्रपटातील करवा चौथच्या प्रसिद्ध सीनवरही टीका केली. तो म्हणाला, "चित्रपटात तुम्ही करवा चौथचे व्रत का केले? आता देशातील सर्व पुरुष तणावात आहेत. बायका म्हणतात की, 'जर अमिताभ बच्चन व्रत ठेवू शकतात, तर तुम्ही कोण आहात?'" हर्षने प्रेक्षकांना हसवत सांगितले की, "अमिताभ सरांनी फक्त कॅमेरा चालेपर्यंतच उपवास केला होता आणि कट झाल्यावर त्यांनी फळे खायला सुरुवात केली असेल!"