'माझं त्यांच्याशी Zero Relationship', कोणावर भडकल्या जया बच्चन? भरकार्यक्रमात घेतली शाळा; थेट उंदरांशी तुलना

अभिनेत्री जया बच्चन यांच्या तापट स्वभावामुळे त्या नेहमीच चर्चेत असतात. पण यामागचे कारण काय आहे, हे त्यांनी बरखा दत्त यांच्या 'We The Women' शोमध्ये स्पष्ट केले. पत्रकारांबद्दल बोलताना त्या म्हणाल्या, "माझे मीडियासोबतचे नाते खूप चांगले आहे. मी स्वतः मीडियाची निर्मिती आहे. माझे वडील पत्रकार होते आणि मी त्यांचा खूप आदर करते. पण पपाराझीसोबत माझे नाते शून्य आहे. हे लोक कोण आहेत? त्यांना या देशाच्या लोकांचे प्रतिनिधित्व करण्यासाठी प्रशिक्षित केले जाते का? तुम्ही यांना मीडिया म्हणता?"

पपाराझीच्या वागण्यावर जया बच्चन यांनी तीव्र संताप व्यक्त केला. त्या म्हणाल्या, "हे जे बाहेर ड्रेन पाईपसारखी गलिच्छ पॅन्ट घालून, हातात मोबाईल घेऊन येतात आणि त्यांना वाटते की ते आमचा फोटो काढू शकतात? ते ज्या प्रकारे अश्लील कमेंट्स करतात, हे कसले लोक आहेत? कुठून येतात? यांचे शिक्षण, पार्श्वभूमी काय आहे? केवळ सोशल मीडियावर आहेत म्हणून ते आमचे प्रतिनिधित्व करणार?"

जया यांनी पपाराझींना 'उंदराची' उपमा देत म्हटलं, "तुम्हाला वाटते की तुम्ही मोबाईल कॅमेरा घेऊन कोणाच्याही खासगी जीवनात घुसखोरी करू शकता?"

आजकाल अनेक युवा कलाकार पपाराझीला पैसे देऊन एअरपोर्टवर त्यांचे फोटो काढण्यासाठी बोलावतात, यावरही जया बच्चन यांनी आपली नाराजी व्यक्त केली. जया म्हणाल्या, "मी त्यांना ओळखत नाही. माझा नातू अगस्त्य बच्चनही सध्या कोणताही सोशल मीडिया वापरत नाहीये. जर तुम्हाला एअरपोर्टवर फोटो काढण्यासाठी लोकांना बोलावावे लागत असेल, तर तुम्ही कसले सेलिब्रिटी आहात?"

एका कर्मचाऱ्याने त्यांना सांगितले होते की, सोशल मीडियावर सर्वात हेट जया बच्चन यांना मिळते. त्यावर त्या म्हणाल्या, "तुम्ही माझा द्वेष करता, हे तुमचे मत आहे. माझे मत आहे की मला तुमचा खूप तिरस्कार आहे."