Shiv Thakare House Fire : 'बिग बॉस' फेम शिव ठाकरेच्या घरात भीषण आग! नेमकं काय घडले? समोर आला भयंकर VIDEO

सेलिब्रिटी फोटोग्राफर विरल भयानी यांनी शिवच्या घराचे व्हिडिओ शेअर करत ही माहिती दिली. आग लागल्यामुळे घरातील मालमत्तेचे झालेले नुकसान झाल्याचे व्हिडिओमध्ये स्पष्ट दिसत होते. अग्नीशमन दलाचे जवान आग लागण्याचे कारण शोधण्यासाठी तपास करत होते. शिव ठाकरे राहत असलेल्या कोळते पाटील वरवे इमारतीमधील त्याच्या घरात ही आग लागली.

शिव ठाकरेची टीम आणि विरल भयानी यांनीही माहिती दिली की, शिव ठाकरे पूर्णपणे सुरक्षित आहे आणि त्याला कोणतीही दुखापत झालेली नाही. आग लागण्याची घटना घडली तेव्हा शिव ठाकरे मुंबईत नव्हता. तो एक दिवसापूर्वीच शहरात परतला होता.

शिवच्या टीमने जारी केलेल्या अधिकृत नोटमध्ये म्हटले आहे की, "@shivthakare9 च्या घरी आज सकाळी एक मोठा अपघात घडला. कोळते पाटील वरवे इमारतीतल्या त्याच्या मुंबईतील घरात आग लागली. सुदैवाने अभिनेत्याला कोणतीही दुखापत झालेली नाही, पण घराचे नुकसान झाले आहे." विशेष म्हणजे, अपघाताच्या एक दिवस आधीच शिवने एअरपोर्टवरून एक फोटो शेअर करत "मुंबई वापसी" असे लिहिले होते.

शिव ठाकरेने एंटरटेनमेंट इंडस्ट्रीमध्ये रिॲलिटी शोच्या माध्यमातून आपली वेगळी ओळख निर्माण केली आहे. 'रोडीज'पासून सुरू झालेला त्याचा प्रवास 'बिग बॉस मराठी', त्यानंतर 'बिग बॉस' हिंदी, 'खतरों के खिलाडी' आणि 'झलक दिखला जा'पर्यंत यशस्वी ठरला. तो नुकताच रश्मी देसाईसोबत 'राज राज नाचन' या म्युझिक व्हिडिओमध्ये दिसला होता.