आधी प्रार्थना बेहेरे, आता या अभिनेत्रीची सासू बनणार निर्मिती सावंत! या दिवशी येतोय नवीन चित्रपट

'कप बशी' हा आगामी मराठी चित्रपट 5 जून रोजी संपूर्ण महाराष्ट्रात प्रदर्शित होणार आहे. नुकतंच या चित्रपटाचं पोस्टर सोशल मीडियावर लाँच करण्यात आलं असून त्याला प्रेक्षकांचा चांगला प्रतिसाद मिळताना दिसतोय. या चित्रपटाचं दिग्दर्शन वैभव चिंचाळकर यांनी केलं आहे.

( Girija Oak : तो क्षण जादुई! 2 दिवस उदयपूरमध्ये होती गिरिजा ओक, तिथे असं घडलं? सगळं वाटू लागलं मॅजिकल, PHOTO )

या सिनेमात निर्मिती सावंत पुन्हा एकदा सासूच्या भूमिकेत दिसणार आहेत. त्यांच्या सोबत अभिनेत्री पूजा सावंत महत्त्वाच्या भूमिकेत आहे. याशिवाय ऋषी मनोहर, नयना आपटे, अनंत जोग, राहुल रानडे, आनंद इंगळे, चिन्मय शिंत्रे, पूर्णिमा तळवलकर, आनंद काळे अशी तगडी स्टारकास्ट या चित्रपटात पाहायला मिळणार आहे. प्रार्थना बेहेरेनंतर पूजा सावंत आणि निर्मिती सावंत या सासू-सुनेची जोडी मोठ्या पडद्यावर पाहायला मिळणार आहे.

'कप बशी' या चित्रपटाची कथा एका सासू-सुनेच्या नात्याभोवती फिरते. अरुण आणि अरुणा हे दांपत्य आपल्या मुलासाठी सून शोधत असतात. मात्र अरुणा यांच्या अध्यात्मिक गुरूंनी सूनेबाबत काही खास अटी घातलेल्या असतात. त्या अटी पूर्ण करणारी मुलगी त्यांना सापडते का? आणि या अटींमुळे लग्न जुळतं की नाही? या प्रश्नांची उत्तरं प्रेक्षकांना चित्रपटातून मिळणार आहेत.

आधुनिक काळातही पत्रिका आणि परंपरांना महत्त्व दिलं जातं यावरही या सिनेमातून भाष्य करण्यात आलं आहे. विनोदी आणि हलक्या-फुलक्या अंदाजात मांडलेली ही कथा प्रेक्षकांचं भरपूर मनोरंजन करेल असा विश्वास निर्मात्यांना आहे.

प्रार्थना बेहरेनंतर आता पूजा सावंतसोबत सासू-सुनेची केमिस्ट्री रंगवताना निर्मिती सावंत कशा दिसतात हे पाहणं इंटेरेस्ट्रिंग ठरणार आहे. पण त्यासाठी प्रेक्षकांना 5 जून पर्यंत वाट पाहावी लागणार आहे.