बापरे! 30 लाख मुलांचा मृत्यू, औषधाचाही होत नाही परिणाम, कारण काय?

यातील बहुतेक मुलं आफ्रिका आणि आग्नेय आशियातील होती. ही मुलं प्रामुख्याने संसर्गाशी संबंधित आजारांनी ग्रस्त होती. पण अँटीबायोटिक्सने काम करणं थांबवलं, ज्यामुळे इतक्या मुलांचा मृत्यू झाला. जेव्हा संसर्ग निर्माण करणारे सूक्ष्मजीव अशा प्रकारे बदलतात की सामान्य प्रतिजैविके त्यांच्याविरुद्ध काम करत नाहीत तेव्हा प्रतिजैविक प्रतिकार विकसित होतो. जगातील लोकसंख्येसमोरील सर्वात मोठ्या सार्वजनिक आरोग्य आव्हानांपैकी हे एक मानलं गेलं आहे.

प्रतिजैविकांच्या अकार्यक्षमतेचे सर्वात मोठं कारण म्हणजे या औषधांचा अनावश्यक वापर. त्वचेच्या संसर्गापासून ते न्यूमोनियापर्यंत विविध प्रकारचे जिवाणू संसर्ग बरे करण्यासाठी किंवा रोखण्यासाठी अँटीबायोटिक्सचा वापर केला जातो. कधीकधी ते खबरदारी म्हणून देखील दिले जातात, जसे की ऑपरेशनपूर्वी किंवा कर्करोगाच्या उपचारादरम्यान. परंतु सर्दी, फ्लू किंवा कोविड सारख्या विषाणूजन्य आजारांवर अँटीबायोटिक्स काम करत नाहीत. अतिरेकी आणि अयोग्य वापरामुळे काही जीवाणूंमध्ये औषध-प्रतिरोधकता विकसित झाली आहे, तर नवीन प्रतिजैविकांचा विकास खूपच मंद आणि महागडा झाला आहे. याचा अर्थ असा की आपण अशा अनेक आजारांसाठी अँटीबायोटिक्स घेतो जिथं त्यांची आवश्यकता नसते. या परिस्थितीत, हे औषध हळूहळू कुचकामी ठरते.