LDL : वाईट कॉलेस्ट्रॉल कमी करण्यासाठी करा आहारात बदल, कॉलेस्ट्रॉल पातळी राहिल नियंत्रणात

आहारात आवश्यक बदल केले नाहीत तर वाईट कोलेस्ट्रॉल कमी करणं कठीण होतं. याबद्दल, माहिती देणारा व्हिडिओ रक्तवहिन्यासंबंधी सर्जन आणि व्हेरिकोज व्हेन्स तज्ज्ञ डॉ. सुमित कपाडिया यांनी त्यांच्या इंस्टाग्राम अकाउंटवरून शेअर केला आहे.

कोलेस्ट्रॉल वाढल्यानं रक्तवाहिन्यांचं हळूहळू नुकसान होतं. कोणते अन्नपदार्थ वाईट कोलेस्ट्रॉल कमी करू शकतात. यासाठी, आहारात काही पदार्थांचा समावेश करता येईल.

मेथीचे दाणे - घरात हमखास मिळणारा पदार्थ. मेथीचे दाणे जेवणाची चव वाढवतात आणि आरोग्यासाठीही खूप फायदेशीर आहेत. मेथीत विरघळणारं फायबर भरपूर प्रमाणात असतं. मेथीमुळे कोलेस्टेरॉल आतड्यांत साचतं आणि शरीर ते शोषू शकत नाही. रात्रभर भिजवून ठेवल्यानंतर मेथी सकाळी खाऊ शकता.

नारळ - नारळ खा पण कमी प्रमाणात..दररोज खाण्याऐवजी तुम्ही तो अधूनमधून खाऊ शकता. नारळ शरीरात चांगलं कोलेस्ट्रॉल वाढवण्याचं काम करतो. ताजा नारळ किसून, खवून, ग्रेव्ही करुन विविध पदार्थांमधे वापरला जाऊ शकतो. नारळाचं तेल हाही एक चांगला पर्याय आहे. नारळ, नारळाचं तेल शरीरासाठी फायदेशीर असलं तरी त्याचं प्रमाण आटोक्यात ठेवा.

भेंडी - भेंडी ही घराघरात वेगवेगळ्या पद्धतीनं केली जाणारी भाजी. भेंडीत म्युसिलेज असतं. म्युसिलेज कोलेस्टेरॉलला रोखण्यासाठी आणि शरीरातून बाहेर काढण्यासाठी उपयुक्त आहे.

सफरचंद - सफरचंद शरीरासाठी अत्यंत फायदेशीर आहे. ते यातल्या पेक्टिन आणि अँटिऑक्सिडंट्समुळे. सफरचंद खाल्ल्यानं यकृताचं कार्य सुधारतं आणि शरीरातील कोलेस्ट्रॉल नैसर्गिकरित्या कमी करण्यास उपयोग होतो. सफरचंदांव्यतिरिक्त, फायबरयुक्त पेरू किंवा व्हिटॅमिन सीयुक्त आवळा देखील खाऊ शकता.

लसूण - कोलेस्ट्रॉल कमी करण्यासाठी लसूण हा सर्वोत्तम पदार्थांपैकी एक आहे. लसूण खाल्ल्यानं वाईट कोलेस्ट्रॉल कमी होतं तसंच रक्तदाब कमी होण्यासही मदत होते. दररोज कच्च्या लसणाच्या एक-दोन पाकळ्या खाऊ शकता.