Bottle Gourd : आरोग्यकारक दुधी भोपळा - त्वचेपासून हृदयाच्या आरोग्यासाठी उपयुक्त

दुधी भोपळा आहारात असल्यामुळे अनेक आजारांपासून प्रकृतीचं रक्षण होतं. त्वचेपासून हृदयापर्यंत आरोग्य सुधारण्यासाठी दुधी भोपळा प्रभावी आहे.

आयुर्वेदात दुधी भोपळा एक औषधी भाजी मानली जाते, दुधीचा रस आणि भाजी हे दोन्ही प्रकार आरोग्यासाठी फायदेशीर आहेत. विशेषत: मधुमेह, लठ्ठपणा, कोलेस्टेरॉल आणि पचनाच्या समस्यांनी ग्रस्त असलेल्यांसाठी दुधी भोपळा सुपरफूड आहे.

दुधीमध्ये मुबलक प्रमाणात आढळणारे फायबर शरीरासाठी फायदेशीर आहे. पचनसंस्था बळकट करून बद्धकोष्ठतेसारख्या समस्यांपासून यामुळे आराम मिळू शकतो. लठ्ठपणा, मधुमेह आणि कोलेस्टेरॉल देखील  यामुळे नियंत्रणात राहतो. दुधी खाल्यानं खराब कोलेस्ट्रॉल कमी होतं आणि हृदयाचं आरोग्य चांगलं राहतं. शरीरातील जळजळ कमी करण्यासाठीही भोपळा उपयुक्त आहे.

फायबर व्यतिरिक्त, दुधीमध्ये असलेली पोषक तत्व रक्तातील साखर नियंत्रित करण्यास मदत करतात. त्यामुळे दुधीचा रस, भाजी मधुमेही रुग्णांसाठी अतिशय फायदेशीर मानली जाते.

दुधी भोपळ्याचा मूळ गुणधर्म थंड असल्यामुळे जास्त कफ आणि वात असलेल्यांनी ते सूप किंवा भाजीच्या स्वरुपात खावं. ज्यांना सर्दी, खोकला किंवा संधिवात आहे त्यांनी दुधीचा रस पिणं टाळावं, शिजवल्यानंतरच दुधी खावा.

दुधी भोपळ्यामध्ये व्हिटॅमिन बी, व्हिटॅमिन सी, लोह आणि सोडियम मुबलक प्रमाणात आढळतात, ज्यामुळे शरीराची प्रतिकारशक्ती मजबूत होते. यामध्ये असलेलं लोह हिमोग्लोबिनची कमतरता भरून काढण्यास मदत करते. वजन नियंत्रित ठेवण्यासाठी तुम्ही त्याचा आहारात समावेश करू शकता.

केस गळणं किंवा टक्कल पडण्याचा त्रास होत असेल तर दुधीच्या पानांचा रस डोक्यावर लावल्यानं खूप फायदा होतो. डोकेदुखीचा त्रास वारंवार होत असेल तर कपाळावर दुधीच्या बियांचं तेल लावल्यानं आराम मिळतो. दुधी भोपळ्यामुळे शरीरात ताजेपणा जाणवतो.