Foot Massage : रोज करा पायांना मसाज, प्रकृतीसाठी गुणकारी आयुर्वेदिक उपाय

आयुर्वेदिक अभ्यासक डॉ. अलका विजयन यांनी त्यांच्या यूट्यूब चॅनेलवर याबाबतचा एक व्हिडिओ शेअर केला आहे. दररोज रात्री झोपण्यापूर्वी पायांना मालिश करण्याचे फायदे त्यांनी या व्हिडिओत सांगितले आहेत.

दृष्टीसाठी खूप उपयुक्त

आपले पाय शरीरातील 72,000 नसा आणि रक्तवाहिन्यांशी जोडलेले असतात. त्यामुळे पायांचं मालिश केल्यानं थकवा तर कमी होतोच, पण डोळ्यांच्या आरोग्यासाठीही ते फायदेशीर ठरतं. पायांच्या तळव्यांमधे काही विशेष बिंदू असतात, ज्यांचा थेट डोळ्यांशी संबंध असतो. दररोज तीळाचं तेल किंवा तूप लावून हलक्या हातांनी मालिश केल्यानं डोळ्यांचा थकवा कमी होतो आणि त्यामुळे दृष्टी सुधारते आणि जळजळ किंवा कोरडेपणा यासारख्या समस्यांपासून देखील आराम मिळतो.

आरामदायी झोप

रात्री उशिरापर्यंत झोप येत नसेल आणि त्यामुळे दुसऱ्या दिवशी थकवा किंवा अशक्तपणा जाणवत असेल, तर पायाला मसाज हा यावरचा एक अतिशय सोपा आणि नैसर्गिक उपाय आहे. तेलानं पायांना मसाज केल्यानं शरीर आणि मन शांत होतं, नसांना आराम मिळतो आणि तणावाची पातळी कमी होते. शरीर आणि मन दोन्ही शांत असेल तर झोप लवकर येते आणि मसाज केल्यानंतर येणारी झोप गाढ आणि आरामदायी असते.

एकाग्रता आणि मनाच्या आरोग्यासाठी फायदेशीर

पायांचा मसाज केवळ शरीरासाठीच नाही तर मनासाठी देखील फायदेशीर आहे. यामुळे मानसिक थकवा दूर होतो आणि मेंदूच्या नसांना आराम मिळतो. यामुळे तुमची लक्ष केंद्रित करण्याची क्षमता, स्मरणशक्ती आणि निर्णय घेण्याची शक्ती सुधारते.

मालिश करण्यासाठी, दररोज रात्री झोपण्यापूर्वी पाय चांगले धुवा आणि स्वच्छ करा आणि वाळू द्या. तिळाचं तेल, नारळ तेल किंवा गायीचं तूप मसाजसाठी वापरू शकता. यानं तळवे, टाचा आणि पायाच्या बोटांना पाच-दहा मिनिटं हलक्या हातानं मालिश करा. रात्रभर पायांवर तेल राहू द्या. सकाळी प्रथम कोमट पाण्यानं पाय धुवा आणि नंतर आंघोळ करा. हे नियमितपणे केल्यानं काही दिवसांतच फरक जाणवू लागेल.