Trending:

Private Part Hygiene : शरीराच्या 'त्या' भागाची स्वच्छता करण्यात महिला करतात चूक, 'या' वयापासूनच घ्यावी हायजिनची खास काळजी

Published by:Manasee Dhamanskar

Last Updated:August 07, 2025 1:31 PM IST

संपूर्ण शरीर स्वच्छ करण्याप्रमाणेच, प्रायव्हेट पार्टची स्वच्छता देखील खूप महत्वाची आहे. परंतु प्रायव्हेट पार्टची वारंवार स्वच्छता करणे देखील हानिकारक असू शकते.

Vaginal Hygiene : आजच्या धावपळीच्या जीवनात आपण आपल्या आरोग्याकडे लक्ष देण्यासाठी वेळ काढतो. परंतु बऱ्याचदा शरीराच्या काही भागांच्या स्वच्छतेबद्दल आपण अनभिज्ञ राहतो. विशेषतः महिलांसाठी, योनीमार्गाची स्वच्छता म्हणजेच गुप्तांगांची स्वच्छता हा एक अतिशय महत्त्वाचा परंतु अनेकदा दुर्लक्षित केलेला विषय आहे. योनी आणि बाह्य जननेंद्रियाची स्वच्छता राखणे हे महिलांच्या आरोग्यासाठी अत्यंत महत्त्वाचे आहे. पण, आजही अनेक महिलांना योनीची स्वच्छता कशी करावी, याची योग्य माहिती नाही. चुकीच्या पद्धतीने स्वच्छता केल्याने संसर्ग, खाज आणि जळजळ यांसारख्या समस्या उद्भवू शकतात. स्त्रीरोग तज्ज्ञांच्या मते, योनीची स्वच्छता 'या' वयापासूनच शिकणे आणि त्याची काळजी घेणे गरजेचे आहे.

योनीची स्वच्छता ठेवण्याचे 6 महत्त्वाचे नियम:

फक्त कोमट पाण्याचा वापर

योनी स्वतःहून स्वतःची स्वच्छता करते. योनीच्या आतमध्ये नैसर्गिकरित्या 'लॅक्टोबॅसिली' नावाचे चांगले जीवाणू असतात, जे पीएच पातळी संतुलित ठेवतात. ही पातळी बिघडू नये म्हणून योनी धुण्यासाठी फक्त कोमट पाण्याचा वापर करावा.

साबण, परफ्यूमयुक्त उत्पादने टाळा

योनीचा पीएच स्तर (pH 3.8-4.5) खूप संवेदनशील असतो. साबण, परफ्यूमयुक्त वॉश, आणि डच केल्याने हा पीएच स्तर बिघडतो, ज्यामुळे चांगले जीवाणू मरतात आणि हानिकारक जीवाणूंची वाढ होते. यामुळे संसर्ग होण्याचा धोका वाढतो.

पुसण्याची योग्य पद्धत

योनीचा भाग समोरून मागच्या बाजूला (फ्रंट टू बॅक) पुसावा. यामुळे गुदद्वारातील जीवाणू योनीमध्ये प्रवेश करत नाहीत आणि मूत्रमार्गाचा संसर्ग (UTI) टाळता येतो.

मासिक पाळीतील स्वच्छता

मासिक पाळीच्या काळात दर 4-6 तासांनी सॅनिटरी पॅड किंवा टॅम्पॉन बदलावे. जास्त वेळ पॅडचा वापर केल्यास जीवाणूंची वाढ होते, ज्यामुळे संसर्गाचा धोका वाढतो.

श्वास घेण्यायोग्य कपड्यांचा वापर

सुती आणि सैल कपड्यांचा वापर करणे आरोग्यासाठी उत्तम आहे. सिंथेटिक कपड्यांमुळे घामामुळे योनीच्या भागात ओलावा टिकून राहतो, ज्यामुळे जीवाणू आणि बुरशीची वाढ होते.

लहानपणापासूनच स्वच्छता शिकवा

मुलींना लहानपणापासूनच मासिक पाळी आणि शरीराच्या स्वच्छतेबद्दल योग्य माहिती देणे आवश्यक आहे. मासिक पाळी सुरू होण्यापूर्वीच, वयाच्या 10 ते 12 वर्षांपासून मुलींना स्वच्छतेचे महत्त्व पटवून देणे महत्त्वाचे आहे.

योनीची स्वच्छता करणे म्हणजे तिला साबणाने घासून स्वच्छ करणे नव्हे, तर नैसर्गिक संतुलन राखणे. या सोप्या टिप्स फॉलो केल्यास महिलांना संसर्ग आणि इतर समस्यांपासून वाचण्यास मदत होते. कोणत्याही प्रकारची समस्या जाणवल्यास त्वरित स्त्रीरोग तज्ञांचा सल्ला घेणे योग्य आहे. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)

Location :

Mumbai,Maharashtra

First Published :

August 07, 2025 1:31 PM IST

Private Part Hygiene : शरीराच्या 'त्या' भागाची स्वच्छता करण्यात महिला करतात चूक, 'या' वयापासूनच घ्यावी हायजिनची खास काळजी