Skin Care : मेकअप केला तर त्वचेचं नुकसान होतं का ? चेहऱ्याची काळजी कशी घ्यावी ? वाचा ब्युटी टिप्स

रोज मेकअप करत असाल तर सौंदर्यतज्ज्ञांनी दिलेल्या टिप्स नक्की वाचा. चेहऱ्याची काळजी योग्यरित्या घेत असाल तर दररोज मेकअप करूनही त्वचेचं कोणतंही नुकसान होत नाही असं सौंदर्य तज्ज्ञ शहनाज हुसेन यांनी सांगितलंय.

मेकअपमुळे त्वचेचं नुकसान होत नाही, पण मेकअप नीट काढला जात नसेल तर त्वचेचं नुकसान होऊ शकतं. त्वचेची काळजी योग्य पद्धतीनं घेतली नाही तर त्वचेवर परिणाम दिसतात.

मेकअप लावून कधीही झोपू नका. यामुळे चेहऱ्यावरची छिद्रं बंद होतात, मुरुमं आणि ब्लॅकहेड्सचा धोका वाढतो आणि कालांतरानं त्वचा निस्तेज दिसू शकते. तेल-आधारित म्हणजेच ऑईल बेस्ड मेकअप रिमूव्हर वापरा किंवा कापसावर थोडं ऑलिव्ह ऑइल लावा आणि मेकअप हळूवारपणे पुसून काढा. मेकअप काढल्यानंतर, काही कण किंवा तेल त्वचेवर राहू शकते.

यासाठी सौम्य फेसवॉशनं चेहरा स्वच्छ करणं महत्वाचं आहे. यामुळे त्वचा स्वच्छ राहते. मृत त्वचा काढून टाकण्यासाठी आणि चेहऱ्यावरची छिद्रं साफ करण्यासाठी आठवड्यातून एक-दोन वेळा चेहरा स्क्रब करू शकता. या सर्वांव्यतिरिक्त, त्वचेला नेहमीच हायड्रेशनची आवश्यकता असते. म्हणून, चांगलं मॉइश्चरायझर वापरा. ​​यामुळे त्वचेतील ओलावा टिकून राहण्यास मदत होते असा सल्लाही सौंदर्यतज्ज्ञांनी दिला आहे.