Diabetes Care Tips: काय सांगता? नाश्ता टाळण्याने डायबिटीस वाढू शकतो ? डायबिटीस नियंत्रणात ठेवण्यासाठी करा ‘या’ सोप्या गोष्टी

मुंबई : डायबिटीसची ओळख एक जीवघेणा आजार अशी झालीये. सुरूवातीला एका गोळीपर्यंत मर्यादीत असलेला डायबिटीस इन्सुलिनच्या इंजेक्शनपर्यंत कसा पोहोचतो हे कळतच नाही. किंबहुना कळलं तरीही फार उशीर झालेला असतो. त्यामुळे शुगर किंवा रक्तातली साखर नियंत्रणात ठेवण्यासाठी अशी लोकं सकाळचा नाश्ता करणं टाळतात किंवा नाश्ता कमी करतात. त्यांना असं वाटतं की असं केल्याने डायबिटीस नियंत्रणात राहू शकेल. मात्र हे चुकीचं आहे. तज्ज्ञांच्या म्हणण्यानुसार, डायबिटीस असलेल्या व्यक्तींसाठी नाश्ता हे सर्वात महत्त्वाचं जेवण आहे. शरीरातली ऊर्जा राखण्यासाठी, रक्तातील साखरेची पातळी संतुलित ठेवण्यासाठी आणि दीर्घकालीन समस्यांचा धोका कमी करण्यासाठी नाश्ता महत्त्वाचा आहे. आहारतज्ञ कनिका मल्होत्रा ​​यांच्या मते, नाश्ता न केल्याने मधुमेहींना अनेक समस्यांचा सामना करावा लागू शकतो. नाश्ता न केल्यामुळे इन्सुलिन प्रतिरोधक क्षमता वाढण्यापासून ते आरोग्याच्या अन्य समस्याही उद्भवू शकतात.