Crime News : निवृत्त जवानाच्या हत्येचं गूढ अखेर उकललं; थेट मध्यप्रदेशातून गुन्हेगाराच्या आवळल्या मुसक्या

राहाता तालुक्यातील लोणी गावच्या परीसरात रविवारी विठ्ठल भोर या निवृत्त जवानाचा मृतदेह आढळला होता. तीक्ष हत्याराने त्यांच्या छातीवर वार केल्याच्या खुणा असल्याने पोलिसांनी हत्या करणाऱ्यांचा शोध सुरू केला. अहमदनगर शहरात राहणारे विठ्ठल भोर यांचा प्रॉपर्टीच्या कारणातून मनोज मोतीयानी यांचे वाद झाले असल्याची माहिती मिळाली. गुन्हे शाखेने त्या दृष्टीने तपास करत मध्यप्रदेशात पळून गेलेल्या मनोज मोतीयानी आणि त्याचा साथीदार स्वामी गोसावी यास ताब्यात घेतले आहे. त्यांनी विठ्ठल भोर यांची हत्या केल्याची कबुली दिली असून त्यांच्यावर खुनाचा गुन्हा दाखल करण्यात आला आहे.

दरम्यान, नगर शहरातून शनिवारी बेपत्ता झालेले माजी सैनिक विठ्ठल नारायण भोर यांचा हा मृतदेह आले आहे. ते हरवले असल्याची नोंद तोफखाना पोलीस ठाण्यात करण्यात आली होती. त्यादृष्टीने पोलिसांकडून खातरजमा केली असता तो मृतदेह भोर यांचा असल्याचे समोर आले. त्यांचा खून करणाऱ्या दोघा संशयितांना स्थानिक गुन्हे शाखेच्या पोलिसांनी ताब्यात घेतले आहे. त्यांच्याकडे चौकशी करण्यात येत आहे. लोणी येथील रूग्णालयात शवविच्छेदन करण्यात आले असून मयत भोर यांच्या नातेवाईकांचा पुरवणी जबाब नोंदवल्या नंतर याबाबत अधिक माहिती समोर येण्याची शक्यता आहे.