Ajit Pawar vs Murlidhar Mohol : अजित पवारांच्या वर्चस्वाला मुरलीधर मोहोळ देणार खो? दादांविरुद्ध अण्णांनी ठोकला शड्डू!

महाराष्ट्र ऑलिम्पिक संघटनेच्या अध्यक्षपदावर उपमुख्यमंत्री अजित पवार यांचं वर्चस्व होतं. मात्र आता मुरलीधर मोहोळ यांच्याकडून आव्हान मिळण्याची शक्यता आहे. निवडणूक निर्णय अधिकाऱ्यांनी अद्याप पात्र उमेदवारांची यादी जाहीर केलेली नाही, तरीही या वेळच्या निवडणुकीला राजकीय वळण लागण्याची चिन्हे दिसत आहेत. अजित पवार यांनी राज्य कबड्डी संघटनेची साथ सोडून खो-खो संघटनेकडून अध्यक्षपदासाठी आपला अर्ज दाखल केला आहे. दुसरीकडे, मोहोळ महाराष्ट्र राज्य कुस्तीगीर संघामार्फत आज, शुक्रवारी उमेदवारी अर्ज भरणार असल्याची माहिती कुस्तीगीर संघाचे सरचिटणीस योगेश दोडके यांनी दिली आहे.

महाराष्ट्र ऑलिम्पिक संघटनेची ही निवडणूक जाहीर झाल्यापासून कोणत्या ना कोणत्या कारणामुळे चर्चेत राहिली आहे. सुरुवातीला मतदानास पात्र असलेल्या संघटनेच्या नावांवरून संघर्ष झाला होता. कबड्डी, कुस्ती आणि जलतरण अशा प्रमुख संघटनांना सुरुवातीला मतदारांच्या यादीतून वगळण्यात आले होते. यावर संघटना आक्रमक झाल्यावर त्यांच्यासह एकूण 31 संघटनांना मतदानासाठी पात्र ठरवण्यात आले. याच दरम्यान, मुंबई उच्च न्यायालयाने कबड्डी संघटनेवर प्रशासक (administrator) नियुक्त करण्याचे आदेश दिले. प्रशासकाकडे कार्यभार सोपवण्यापूर्वीच मतदारांची नावे महाराष्ट्र ऑलिम्पिक संघटनेकडे पाठवण्यात आल्याचे संघटनेच्या वरिष्ठ सूत्रांनी सांगितले. जलतरण संघटनेकडून मतदानासाठी मतदारच पाठवण्यात आलेला नाही.

त्यामुळे आता 2 नोव्हेंबर रोजी होणाऱ्या या निवडणुकीत 31 पैकी 30 पात्र संघटनांमधून 60 मतदार मतदानाचा हक्क बजावतील. उमेदवारी अर्ज भरण्याची मुदत सुरू होताच अजित पवार यांनी अध्यक्षपदासाठी अर्ज भरला आहे. त्यांनी खो-खो संघटनेकडून हा अर्ज दाखल केला आहे. विशेष म्हणजे महाराष्ट्र ऑलिम्पिक संघटनेचे अध्यक्ष म्हणून पवार यांचे चार वर्षांचे तीन कार्यकाळ पूर्ण झाले आहेत. अर्ज भरण्याची मुदत 11 ऑक्टोबर रोजी संपणार असून, त्यानंतर छाननी आणि त्यावरील आक्षेपांची चौकशी 14 ऑक्टोबरपर्यंत चालणार आहे. त्यानंतर पात्र उमेदवारांची अंतिम यादी 14 ऑक्टोबर रोजी जाहीर केली जाईल.