SUV पेक्षा 'बिजल्या' ठरला भारी, शेतकऱ्याला केलं लखपती, किंमत ऐकून सगळेच अवाक्

जालना : शेतात राबणारा बैल हा शेतकऱ्याचा मोठा आधार असतो. पण, आता याच आधाराने जालन्यात एका शेतकऱ्याला लखपती केलं आहे. जालन्यातील मंठा येथील एका शेतकऱ्याकडे असलेल्या बिजल्या नावाच्या बैलाने शेतकऱ्याचं नशीब पालटलं आहे. हा बिजल्या बैल तब्बल ११ लाख ११ हजारांना विकला गेला आहे. त्यामुळे पंचक्रोशीत या बिजल्याने एकच हवा केली आहे.

जालन्यात एक बैल विकून शेतकरी लखपती झाला आहे. मंठा तालुक्यातील कानफोडी येथील पवन राठोड असं या शेतकऱ्याचं नाव आहे. पवन राठोड यांच्याकडे बिजल्या नावाचा एक बैल होता.  घोड्यालाही घाम फोडणारा अशी बिजल्याची ओळख आहे. बिजल्या हा बैलगाडा शर्यतीतला किंग आहे. त्याने आतापर्यंत २५ शर्यती जिंकल्या आहे. बिजल्याचा वेग आणि चपळपणा यामुळे बैलगाडा शर्यतीत त्याची दहशत होती. हेच पाहून सांगली जिल्ह्यातल्या कटरेवाडी येथील सागर कटरे यांनी हा बैल 11 लाख 11 हजार रुपयांना खरेदी केला आहे. त्यामुळं एक बैल विकून शेतकरी लखपती झाला आहे.

शर्यती जिंकणाऱ्या बिजल्या सोशल मीडियावरही स्टार आहे. इंस्टाग्रामवर त्याचे हजारो फॉलोअर्स आहे. अवघ्या ५ सेकंदात ६० पॉईंट धावणारा असा बिजल्या मराठवाड्यातला स्टार ठरला आहे. बिजल्याला पवन राठोड यांनी तामिळनाडूमधून १० महिन्याच्या असताना ५१ हजार रुपयांमध्ये विकत घेतलं होतं. त्याची चांगली देखभाल केली. बिजल्याला रोज ३ लिटर दूध लागतं. तसंच बदाम, उडीद डाळ असा त्याचा रोजचा आहार आहे. एवढंच नाहीतर त्याला दोन दिवस आड गरम पाण्याने आंघोळ घालावी लागते.