फडणवीसांसमोर SC चे निकाल ठेवले आणि सांगितले निर्णय घ्याल तर उद्याच कोर्टात जातो, भुजबळांचा एल्गार

मुंबई : मराठा हे सामाजिकदृष्ट्या सामाजिक मागास नाहीत, तर पुढारलेले आहेत. मराठा कुणबी समाजाचे एकत्रीकरण होऊ शकत नाही, असे सर्वोच्च न्यायालयाने अनेकदा सांगितलेले आहे. परंतु तरीही सरसकट मराठा समाजाला कुणबी दाखले देण्याची मागणी होत आहे. आम्ही आज मुख्यमंत्री फडणवीस यांची भेट घेतली. आरक्षणाच्या अनुषंगाने सर्वोच्च न्यायालयाचे याआधीचे निर्णय अर्थात निकाल आम्ही मुख्यमंत्री फडणवीस यांच्यासमोर ठेवले. जर जरांगे पाटील यांच्या मागणीनुसार आपण सरसकट मराठा समाजाला कुणही दाखले देण्याचा निर्णय घेतला तर आम्ही दुसऱ्या दिवशी न्यायालयात जाऊ, अशी ताकीद आम्ही त्यांना दिली, असे ओबीसी आरक्षण बचाव आंदोलनाचे नेते, मंत्री छगन भुजबळ म्हणाले. तसेच मुख्यमंत्र्‍यांच्या भेटीवेळी राज्याचे उपमुख्यमंत्री अजित पवार आणि दुसरे उपमुख्यमंत्री एकनाथ शिंदे हे देखील हजर होते. त्यांच्यासमोरच आमची सगळी चर्चा झाली, असे भुजबळ यांनी आवर्जून सांगितले.