देव तारी त्याला..., कंटेनरखाली सायकलचा चक्काचूर, पण वाहतूक पोलिसांनी असा वाचवला जीव...

‎दुपारी 12 वाजेच्या सुमारास ही थरकाप उडवणारी घटना घडली. वडगाव कोल्हाटी (पंढरपूर) येथील प्रल्हाद बाडगे वय 60 हे एका खासगी कंपनीत सुरक्षा रक्षक म्हणून कार्यरत आहेत. कुटुंबाचा भार सांभाळणारे बाडगे मंगळवारी सकाळी सायकल दुरुस्ती करून घरी परतत होते. तिरंगा चौकात सिग्नल सुटताच बजाजनगरकडून कामगार चौकाकडे भरधाव वेगाने जाणाऱ्या कंटेनर (आरजे 32 जीबी 7207) ने त्यांच्या सायकलला जोरदार धडक दिली.

‎धडक बसताच सायकल खाली कोसळली आणि कंटेनरच्या मागच्या चाकाखाली ते येण्यापूर्वीच तेथे ड्यूटीवर असलेले वाहतूक शाखेचे पोलिस उपनिरीक्षक कारभारी गायकवाड, इम्रान अतार, गोपाल पुरबे, उस्मान शेख तसेच रिक्षाचालकाने क्षणार्धात त्यांना बाजूला खेचले. त्याच वेळी कंटेनर पुढे निघून गेल्याने मोठा अनर्थ टळला. बाडगे किरकोळ जखमी झाले असून, त्यांच्या सायकलचे पूर्ण नुकसान झाले आहे.

पोलिसांनी कंटेनर चालकाला ताब्यात घेतले आहे. प्रत्यक्षदर्शीच्या सांगण्यानुसार वाहतूक पोलिसांनी क्षणाचाही विलंब न करता आवाज देत सायकलस्वाराला वाचवले. या अपघातामुळे काही काळ वाहतुकीचा खोळंबा झाला, पोलिसांनी रस्ता मोकळा केला.