आई माझ्याजवळच राहा त्रास होतोय, ऑपरेशन थिएटरमध्ये नेताना ऋषिकेशचं आर्जव, अन् काही तासांत घडलं धक्कादायक

छत्रपती संभाजीनगर : आई माझ्याजवळच राहा त्रास होतोय फक्त एवढंच सांगत ऋषिकेश ऊर्फ अजय अनिल गव्हाणे (24) ऑपरेशन थिएटरमध्ये गेला. आईच्या डोळ्यात अश्रू, आणि मुलाच्या चेहऱ्यावर काही होणार नाही अशी हलकीशी आशा. पण नशीब काही वेगळंच ठरवून बसलेलं होतं. काही तासांत ऋषिकेशची प्रकृती बिघडली आणि मंगळवारी सकाळी डॉक्टरांनी आईसमोरच एकाच धक्क्यात सांगितले तो नाही…एकुलत्या एका मुलाच्या मृत्यूची बातमी ऐकताच कुटुंबीयांचे हृदय कोसळले. त्या दुःखातून उठलेल्या वेदना संतापात बदलल्या… आणि रामनगर रोडवरील रुग्णालयापासून सिडको चौकातील खासगी रुग्णालयापर्यंत नातेवाइकांनी ठिय्या आंदोलन सुरू केले. डॉक्टरांच्या हलगर्जीपणामुळेच ऋषिकेशचा मृत्यू झाला, असा त्यांचा आरोप होता.