आई-वडील नाहीत, सुरू केलं वृद्धाश्रम! सरकारी मदत नाही, हे दाम्पत्य मसाज सेंटरच्या पैशातून करतंय 30 जणांचा सांभाळ!

कृपाळू वृद्धाश्रमात संपूर्ण महाराष्ट्रातून आलेल्या वृद्ध महिला आणि पुरुषांचा असे 30 जणांचा सांभाळ या ठिकाणी केला जातो. या वृद्धाश्रमाला कुठलाही शासकीय किंवा राजकीय पाठिंबा नाही. कृपाळू वृद्धाश्रम संस्थापक संतोष सुरडकर हे मसाज व्यवसाय करतात. त्यांच्या कमाईतून वृद्धाश्रमाचा खर्च भागवला जातो. तसेच कुणी स्वतःहून मदत केल्यास त्याचा देखील स्वीकार करून, कृपाळू वृद्धाश्रम चालवण्यासाठी हातभार लागतो. या कामातून समाधान मिळत असल्याचे सुरडकर यांनी सांगितले.

शहरातील पहाडसिंगपुरा परिसरात 3 वर्षांपूर्वी कृपाळू वृद्धाश्रम सुरू झालेले आहे. वृद्धाश्रम चालवण्यासाठी आर्थिक अडचणी भरपूर येतात, काही नागरिक या ठिकाणी किराणा सामान, विविध वापरात येणाऱ्या वस्तू, आर्थिक सहकार्य करतात. त्यामुळे हे वृद्धाश्रम चालवण्यास मदत होते. सुरडकर यांना आई-वडील नाहीत. त्यामुळे वृद्धाश्रमातल्याच वृद्ध महिला व पुरुष यांना आई-वडील मानून ते त्यांची सेवा करत आहेत.