हिरा, खणखणीत नाणं अन् बरचं काही.. मालवणात भाजपशी पंगा घेणाऱ्या निलेश राणेंचं शिंदेकडून भरभरून कौतुक

भाजप कार्यकर्त्याच्या घरी बेकायदेशीरपणे घुसल्याप्रकरणी शिवसेना आमदार निलेश राणेंविरोधात गुन्हा दाखल करण्यात आलाय. याबद्दल एकनाथ शिंदेंनी शिवसेना निलेश राणेंच्या पाठिशी असल्याचं म्हटलंय. तसेच निलेश राणे शिवसेनेचं खणखणीत नाणं असे म्हणत उपमुख्यमंत्री एकनाथ शिंदेंकडून निलेश राणेंचं कौतुक केले आहे.

एकनाथ शिंदे म्हणाले, 3 तारखेला फटाके फोडायचे आहेत आणि निलेशकडे तर फटाकेच फटाके आहेत. निलेश राणेचा मला सार्थ अभिमान आहे. इलाका कोणाचाही असो… धमाका निलेशच करणार आहे. मी डॉक्टर नसतानाही अनेक ‘ऑपरेशन’ (राजकीय) केली आहेत. चांगलं काम करताना घाबरायचं नाही. पराभव दिसायला लागला की दशावतार सुरू होतात.

कोकणी माणूस फणसासारखा बाहेरुन काटेरी आणि आतून गोड. म्हणून शिवसेनेची कर्मभूमी आहे. कोकण आणि शिवसेना एकच आहेत. मला काम करणारा आवडतो, म्हणून मला निलेश राणे आवडतो. कोकणात दगड आहेत, चिरा आहेत… पण निलेश राणे हा शिवसेनेचा ‘हिरा’ आहे. लाडक्या बहिणीसाठी आणि भावांसाठी काम करेन रक्ताचा थेंब असेपर्यंत संधी सोडू नका. धनुष्यबाणावरचं बटण दाबून मालवणवर भगवा फडकवा असे एकनाथ शिंदे म्हणाले.

बाळासाहेबांच्या नेतृत्वात नारायण राणे मुख्यमंत्री असताना अनेक प्रकल्प आले. उदय सामंत यांना अनेक सभेत फोन करून उद्योग मंत्री म्हणून उद्योग वाढवण्याचे काम करण्यासाठी फोन केले. पक्षासाठी, आपल्या मतदानासाठी जीवाच रान करत आहेत. अनेक प्रकल्प आपल्याला इकडे करायचे आहेत. निलेश राणे मालवणचा प्रस्ताव द्या, मालवणचा कायापालट करू असेही एकनाथ शिंदे म्हणाले.

मालवण नगरपरिषदेच्या निवडणुकीच्या प्रचारासाठी शिवसेनेच एकनाथ शिंदेंच्या उपस्थितीत सभा पार पडली. यावेळी शिवसेनेवर ज्यांनी वार करण्याचा प्रयत्न केला त्यांच्यावर एक नाही दोन वार केले. मात्र, पक्षावर वार होऊ दिला नाही, असं निलेश राणे म्हणले. एकनाथ शिंदे यांनी तिकीट दिलं, त्यांची साथ कधीच सोडणार नाही असं निलेश राणे म्हणाले.