Markadwadi Solapur Ballot Elections : ईव्हीएमविरोधात बॅलेटवर मतदान, पोलिसांचा बंदोबस्त, जमावबंदीचे आदेश, मारकडवाडीत आज काय होणार?

सोलापूर जिल्ह्यातल्या माळशिरस मतदारसंघातल्या मारकडवाडी गावात मतपत्रिकेवर आज मतदान होणार आहे. प्रशासनाने मारकडवाडी गावातील मतदान प्रक्रियेवर आक्षेप घेतला आहे. गावात मोठा पोलीस बंदोबस्त तैनात करण्यात आला आहे. गावात 5 डिसेंबरपर्यत जमावबंदीचा आदेश लागू करण्यात आला आहे.

मारकवाडी मतदारसंघातून शरद पवार गटाचे उत्तमराव जानकर विजयी झालेले आहेत. परंतु मारकडवाडी गावामधून भाजप-महायुतीचे उमेदवार राम सातपुतेंना लक्षणीय मते मिळाली. त्यामुळे शंका आलेल्या गावकऱ्यांनी तिथे बॅलेट पेपरवर फेरमतदान घेण्याची तयारी दर्शवली.

जानकर यांचे मताधिक्य घटण्यामागे ईव्हीएमचे कटकारस्थान असल्याचा गावकऱ्यांना संशय आहे. मारकडवाडीमध्ये जानकर यांच्या बाजूने 80 टक्के मतदान झाल्याचा दावा ग्रामस्थांनी व्यक्त केला. मात्र, ईव्हीएममधून वेगळीच आकडेवारी समोर येत आहे. नुकत्याच झालेल्या विधानसभा निवडणुकीत राम सातपुते यांना 843 तर जानकर यांना 1003 मते मिळाली आहेत. या मतदानावर गावकऱ्यांना संशय आहे. त्यामुळे पुन्हा बॅलेट पेपरवर मतदान प्रक्रिया राबवून ईव्हीएमची पोलखोल करण्याचा निर्णय गावकऱ्यांनी घेतला आहे. सातपुते गावातून फारतर शे-दीडशे मते मिळायला पाहिजे होती, असे ग्रामस्थांनी सांगितले.

गावात आज सकाळी 8 ते सायंकाळी 4 वाजेच्या दरम्यान मतदान होणार आहे. त्यानंतर लगेच 5 वाजेपासून मतमोजणीला सुरुवात होणार आहे. माळशिरस विधानसभा मतदारसंघातील मारकडवाडी गावामध्ये मतदान करण्यासाठी ग्रामस्थ जमत आहेत. या ठिकाणी मोठ्या प्रमाणावर पोलीस बंदोबस्त तैनात करण्यात आलेला आहे. महाविकास आघाडी राष्ट्रवादी शरदचंद्र पवार पक्षाचे आमदार उत्तम जानकर यांनी देखील मतदान केंद्राला भेट दिली. गावातील मतदार हे मतदान करण्यावरती ठाम असून ते मतदान करतील असं जाणकार यांनी म्हटले.