Ladaki Bahin Yojana : मुख्यमंत्री लाडकी बहीण योजनेवरुन अजितदादा गटाचे आंदोलन; महिलांनी केली मोठी मागणी

गोंदिया जिल्ह्यात अनेक सेतू केंद्रावर मुख्यमंत्री लाडकी बहीण योजनेच्या कागदपत्रांसाठी मोठ्या प्रमाणात गर्दी दिसून येत आहे. अशातच या योजनेसाठी पुरुषांना देखील महिलांना मदत करावी लागत आहे. तर विविध साहित्यासाठी पुरुषांनाही त्रास सहन करावा लागत आहे. अशीच एक घटना अर्जुनी मोरगाव येथे घडली. कागदपत्र आणत असताना एका महिलेचा पत्नी अपघातात मरण पावला. त्यामुळे अर्जुनी मोरगाव तालुक्यातील महिलांनी या योजनेमधील कागदपत्रांची अट शिथील करावी आणि वयोवृद्ध महिलांना सुद्धा या योजनेचा लाभ द्यावा आणि प्रत्येक ग्रामपंचायतमध्ये सेतू केंद्र उघडावे, घर टॅक्स पावती अनिवार्य करू नये अशा विविध मागण्यांना घेऊन महिलांनी मुक मोर्चा काढला. अर्जुनी मोरगाव येथील तहसील कार्यालयावर हे आंदोलन करण्यात आले.