ढिगभर कागदपत्र, ईडीचा छापा... तरीही मुश्रीफ निसटले, सोमय्यांनी आरोप केलेल्या प्रकरणात क्लिन चीट

वैद्यकीय शिक्षण मंत्री हसन मुश्रीफ यांना सरसेनापती संताजी घोरपडे साखर कारखान्यातील कथित 40 कोटी रुपयांच्या आर्थिक गैरव्यवहारप्रकरणी अखेर क्लीन चीट मिळाली आहे. मुरगूड पोलिसांनी कागल न्यायालयात क्लोजर रिपोर्ट (सी-समरी) दाखल केल्यानंतर, त्यावर आधारित याचिका उच्च न्यायालयात दाखल करण्यात आली होती. आता मुश्रीफ यांच्याविरोधातील गुन्हा उच्च न्यायालयाने रद्द केल्याने, त्यांना मोठा कायदेशीर दिलासा मिळाला आहे.

न्यायमूर्ती अजय गडकरी आणि न्यायमूर्ती राजेश पाटील यांच्या खंडपीठाने निकाल दिला आहे. विशेष म्हणजे, या गुन्ह्याच्या आधारेच अंमलबजावणी संचालनालय (ईडी) कडून गुन्हा दाखल करण्यात आला होता. त्यामुळे ही क्लिन चीट मुश्रीफ यांच्यासाठी महत्त्वाची मानली जात आहे.

भाजपचे माजी खासदार किरीट सोमय्या यांनी दोन वर्षांपूर्वी हसन मुश्रीफ यांच्यावर 40 कोटी रुपयांच्या अफरातफरचे आरोप करत मोठा राजकीय वाद निर्माण केला होता. त्यानंतर कोल्हापुरातील राजकीय वातावरण ढवळून निघाले होते. ईडीने मुश्रीफ यांच्या घरावर छापा मारला होता. ही कारवाई अनेक तास सुरू होती. ईडीच्या छाप्यांपासून ते अटकपूर्व जामिनाच्या अर्जांपर्यंत, संपूर्ण घटनाक्रमात मुश्रीफ सतत केंद्रस्थानी होते.

या प्रकरणात 10 मार्च 2023 रोजी उच्च न्यायालयाने त्यांना अंतरिम संरक्षण दिले होते. दरम्यान, त्यांनी महायुतीत प्रवेश करत शिंदे-फडणवीस सरकारमध्ये वैद्यकीय शिक्षण मंत्रीपदही मिळवले.

अतिरिक्त सरकारी वकील आशिष सातपुते यांनी न्यायालयाला दिलेल्या माहितीनुसार, मुरगूड पोलिसांनी कागल न्यायालयात 'सी-समरी' क्लोजर रिपोर्ट सादर केला आहे. या अहवालाच्या आधारे गुन्हा रद्द करण्यासाठी हसन मुश्रीफ यांनी उच्च न्यायालयात याचिका दाखल केली होती, जी आता निकाली काढण्यात आली आहे.

किरीट सोमय्या यांनी छगन भुजबळ यांच्या विरोधात आरोपांचा धुरळा उडवला होता. महाराष्ट्र सदन घोटाळा प्रकरणात भुजबळांना काही वर्ष तुरुंगात काढावी लागली होती. महाराष्ट्र सदन घोटाळा प्रकरणात छगन भुजबळ, त्यांचे पीए श्याम राधाकृष्ण मालपाणी यांना कोर्टाने दोषमुक्त केले होते. भुजबळांसह त्यांचा मुलगा व पुतण्याला सुद्धा आधीच मुळ गुन्ह्यातून दोषमुक्त केले आहे.