कपडे जळाले, मानेला लागलं अन् गेला जीव, दिवाळीची साफ-सफाई युवकाच्या बेतली जीवावर

फटाका विक्रेत्यानं घराची साफ सफाई करण्यासाठी पाठवलेल्या बालमजुराचा शॉक लागून मृत्यू झाला. काम करत असताना 17 वर्षीय मुलाचा पाय विजेच्या तारेवर पडला आणि शॉक बसून जागीच त्याचा जीव गेला.

समोर आलेली घटना भुसावळमधील मन्यारखेडा येथील आहे. सुनील चव्हाण नावाचा 17 वर्षीय तरुण मंगळवारी अनिल अग्रवाल यांच्या फटाक्याच्या दुकानात कामाला होता. अनिल यांनी त्याला घरी साफ सफाईसाठी पाठवलं. त्याच्यासोबत आणखी एक मुलगा साफ सफाईच्या कामासाठी आला होता. मोकळ्या प्लॉटमधील गवत काढताना त्याचा पाय विजेच्या तारेवर पडला. शॉक एवढा भयंकर लागला की, त्याचे कपडे जळाले आणि त्याच्या मानेलाही गंभीर दुखापत झाली. यानंतर सुनीलला रुग्णालयात नेण्यात आलं उपचारादरम्यान त्याचा जीव गेला.

या घटनेनं परिसरात एकच खळबळ उडाली. कुटुंबियांनाही मोठा धक्का बसला. संपूर्ण कुटुंबीय मोलमजुरी करत असल्यानं सुनील हा मिळेल ते काम करून कुटुंबाला हातभार लावत होता.