रात्री झोपण्यापूर्वी कोणते खाद्यपदार्थ अजिबातच खाऊ नयेत?, डॉक्टरांनी दिली महत्त्वाची माहिती

जालना : बदलत्या जीवन पद्धतीनुसार आपल्या खानपानाच्या पद्धतीमध्येही बरेच बदल झाले आहेत. हल्ली जेवणानंतर वेगवेगळी पेय खाद्यपदार्थ तसेच गोड पदार्थ खाण्याचा ट्रेंड वाढत आहे. यामध्ये आईस्क्रीम, मिल्क शेक, दूध, कॉफी इत्यादी खाद्यपदार्थ आणि पेय यांचा समावेश होतो. मात्र, हे खाद्यपदार्थ आपल्या चयापचय क्रियेवर परिणाम करतात. यामुळे अपचन, लठ्ठपणा, हृदयाचे आजार यासारख्या समस्या उद्भवतात. त्यामुळे रात्री जेवण केल्यानंतर कोणते खाद्यपदार्थ घेणे टाळावे, याबाबत ओबीसीटी कन्सल्टंट डॉ. अमृता कुलकर्णी यांनी माहिती दिली.

लोकल18 शी बोलताना त्यांनी सांगितले की, आपल्या सर्वांना आहार आणि इन्सुलिन याचा संबंध आहे हे माहीत असेलच. सकाळी उठल्यानंतर इन्सुलिनचं सिक्रेशन सुरू होते. दुपारच्या वेळी इन्सुलिन सिक्रेशन सगळ्यात जास्त पातळीवर असते तर सायंकाळी आणि रात्री ते सर्वात कमी असते. यामुळे रात्री सात वाजेच्या आसपास आपण रात्रीचे जेवण करायला हवे.

रात्रीच्या वेळी दूध घेतल्याने लिव्हर संथ गतीने काम करते. त्याचबरोबर दूध पचनास जड आहे. त्यामुळे आपली पचन क्रिया बिघडते म्हणून रात्रीच्या वेळी दूध घेणेदेखील टाळायचे आहे. याचबरोबर रात्री अल्कोहोल घेणेदेखील टाळणे आरोग्यासाठी उत्तम आहे. टोमॅटोमध्ये भरपूर प्रमाणात अॅसिडिक पदार्थ असल्याने याचे सेवनही रात्रीच्या वेळी टाळायचे आहे. यामुळे अॅसिडिटी, जळजळ होणे अशा समस्या उद्भवू शकतात.