'हातवारे करू नका, आवाज खाली करा', रोहित पवारांचा पारा चढला, पोलीस ठाण्यातला VIDEO व्हायरल

दरम्यान, आव्हाडांसह काही कार्यकर्त्यांनी मध्यस्थी केल्यानंतर पोलीस ठाण्यातला तणाव निवळला. पण या संपूर्ण घटनेचा व्हिडीओ आता समोर आला असून सोशल मीडियावर व्हायरल होत आहे. ज्यात रोहित पवार एका पोलीस अधिकाऱ्यावर संताप व्यक्त करताना दिसत आहेत.

विधानभवन परिसरात गुरुवारी दुपारी पडळकरांच्या कार्यकर्त्यांनी आव्हाडांच्या कार्यकर्त्याला मारहाण केली. याचे पडसाद रात्रभर उमटले. आमदार जितेंद्र आव्हाड यांचा कार्यकर्ता नितीन देशमुख याला पोलीस रात्री १२ वाजता विधानभवनात अटक केली. मात्र ही गोष्ट जितेंद्र आव्हाड यांना कळताच ते तत्काळ विधानभवन परिसरात पोहोचले आणि पोलिसांच्या गाडीसमोर कार्यकत्यांसह ठिय्या दिला. या आंदोलनात सहभागी होण्यासाठी आमदार रोहित पवार देखील दाखल झाले जितेंद्र आव्हाड ठिय्या आंदोलनावर ठाम असताना पोलिसांनी दीड वाजता आंदोलकांची धरपकड केली, जितेंद्र आव्हाड यांनी पोलिसांची गाडी अडवून ठेवली. पण पोलिसांनी आव्हाडांना गाडी समोरून बाजुला खेचत बाहेर काढले आणि नितीन देशमुख यांना घेऊन गेले.

काही दिवसांपूर्वी जितेंद्र आव्हाड यांनी विधान भवनाच्या परिसरात गोपिचंद पडळकर यांना मंगळसूत्र चोर म्हणून डिवचल्यानंतर या वादाला सुरुवात झाली होती. त्यानंतर गुरुवारी गोपीचंद पडळकर आणि जितेंद्र आव्हाड आमने सामने आले असता दोघांनी एकमेकांना शिवीगाळ करून धमकी दिली. त्यानंतर जितेंद्र आव्हाड यांनी आपल्याला जिवे मारण्याची धमकी आल्याचा आरोप केला होता. याबाबतचे काही धमकीचे मेसेज त्यांनी सोशल मीडियावर पोस्ट केले. त्यानंतर दोन्ही नेत्यांचे कार्यकर्ते विधान भवनाच्या आवारातच एकमेकांना भिडल्याने या वादाने गंभीर वळण घेतलं आहे.