कल्याणमध्ये सापडलेला तो मृतदेह 'राजू चाचा'चा, पत्नी अन् दोन मुलांचा भयानक कट, डेडबॉडी झुडुपात फेकली!

भारतीय न्याय संहिता (बीएनएस) च्या कलम 103(1) आणि 238 अंतर्गत टोकावडे पोलीस ठाण्यात गुन्हा दाखल करण्यात आला. गुन्ह्याचे गांभीर्य लक्षात घेऊन एसपी डॉ. डी.एस. स्वामी आणि अतिरिक्त एसपी अनमोल मित्तल यांनी समांतर तपासाचे आदेश दिले. एलसीबीचे वरिष्ठ पोलिस निरीक्षक संदीप गिते यांच्या नेतृत्वाखाली अनेक तपास पथके स्थापन करण्यात आली.

पथकांनी आजूबाजूच्या परिसरातील विविध सीसीटीव्ही फुटेज तपासले आणि महाराष्ट्रातील हरवलेल्या व्यक्तींचे अहवाल देखील तपासले आणि संशयास्पद वाहनांची तपासणी केली. सुरुवातीच्या प्रयत्नांमध्ये मृत व्यक्तीची ओळख पटवण्यात यश आले नाही. तपासादरम्यान असे आढळून आले की मृताच्या नातेवाईकांनी बेपत्ता झाल्याची कोणतीही तक्रार दाखल केली नव्हती.

पीएसआय महेश कदम यांच्या नेतृत्वाखालील तांत्रिक विश्लेषणातून मृताची ओळख पटली. हत्या झालेल्या व्यक्तीचं नाव राजेश शांतीलाल ठक्कर उर्फ राजू चाचा, असल्याचं निष्पन्न झालं. राजेश शांतीलाल ठक्कर हे कल्याणच्या काटेमानिवली भागात राहत होते. यानंतर पोलिसांनी तपासाची सूत्रे फिरवली आणि ठक्कर यांचा सावत्र मुलगा नवीद लतीफ सय्यद (वय 28) याला शोधून काढलं. यात नवीदने आपण आई आशा लतीफ सय्यद (55) आणि भाऊ नाझीम लतीफ सय्यद (26) यांच्यासोबत मिळून हत्या केली, असं कबूल केलं.

'चौकशीदरम्यान, आरोपीने कबूल केले की मृताच्या सततच्या छळाला कंटाळून ही महिला त्याला संपवण्याचा कट रचत होती,' असे एका पोलिस अधिकाऱ्याने सांगितले. तिन्ही आरोपींना अटक करण्यात आली आहे आणि पुढील तपासासाठी टोकावडे पोलिसांच्या ताब्यात देण्यात आले आहे. वरिष्ठ अधिकाऱ्यांच्या मार्गदर्शनाखाली एलसीबी टीम आणि सायबर युनिटने ही कारवाई केली. पुढील तपास सुरू आहे.