Kolhapur News : कोल्हापूरला मिळणार विरोधी पक्षनेतेपद? सतेज पाटील यांच्या नावाची मोठी चर्चा; पण...

महाविकास आघाडीच्या सध्याच्या रचनेत विधान परिषदेत एकूण 16 सदस्य आहेत. यापैकी काँग्रेसचे सर्वाधिक 7, उद्धवसेनेचे 6 आणि राष्ट्रवादी काँग्रेस (शरदचंद्र पवार पक्ष) 3 सदस्य आहेत. विधानसभेचे विरोधी पक्षनेतेपद उद्धवसेनेकडे जाणार असल्याने, विधान परिषदेतील विरोधी पक्षनेतेपदावर काँग्रेसने स्वाभाविकपणे दावा केला आहे.

पश्चिम महाराष्ट्रात काँग्रेसची संघटनात्मक जबाबदारी सतेज पाटील यांच्या खांद्यावर आहे. त्यांनी शक्तिपीठ महामार्गासारख्या मोठ्या प्रकल्पांसह राज्यातील अनेक प्रश्नांवर सातत्याने आवाज उठवला आहे. त्यांचे उत्कृष्ट संघटनकौशल्य आणि मोठा जनसंपर्क यामुळे काँग्रेसने त्यांचे नाव या पदासाठी पुढे आणले आहे. या संदर्भात बोलताना आमदार सतेज पाटील म्हणाले, "महाविकास आघाडीमध्ये या पदासाठी प्राथमिक चर्चा सुरू आहे, मात्र अद्याप अंतिम निर्णय झालेला नाही."