शिवाजी विद्यापीठातील छत्रपतींचा अश्वारुढ पुतळा, कशी साकारली अजरामर कलाकृती?

कोल्हापूर : शिवरायांचे आठवावे रुप | शिवरायांचा आठवावा प्रताप | शिवरायांचा आठवावा साक्षेप| भूमंडळी | अशा शब्दांत छत्रपती शिवरायांच्या कार्याची महती सांगितली जाते. हीच महती सांगत कोल्हापुरातील शिवाजी विद्यापीठात छत्रपती शिवाजी महाराजांचा पुतळा गेल्या 50 वर्षांपासून ऊन, वारा, पावसात पहाडासारखा उभा आहे. शिवाजी विद्यापीठात येणारा आणि विद्यापीठासमोरून जाणारा प्रत्येकजण या देखण्या आणि रुबाबदार पुतळ्याला गेल्या 50 वर्षांपासून हात जोडत आला आहे. याच छत्रपती शिवरायांच्या पुतळ्याला 1 डिसेंबर रोजी 50 वर्षे पूर्ण होत असून त्याचा सुवर्णमहोत्सव साजरा होतोय. याबाबत शिवाजी विद्यापीठाचे कुलसचिव डॉ. व्ही. एन. शिंदे यांनी लोकल18 सोबत बोलताना माहिती दिलीये.

शिवाजी विद्यापीठ दक्षिण महाराष्ट्रातील विद्येचं प्रमुख पीठ मानलं जातं. उच्च शिक्षणाच्या संधी ग्रामीण भागातील उपलब्ध करुन देण्याच्या उदात्त हेतूने या विद्यापीठाची स्थापना झाली. छत्रपती शिवाजी महाराजांच्या नावानं स्थापन झालेल्या विद्यापीठाच्या प्रांगणात असणारा छत्रपती शिवरायांचा पुतळाही अलौकिक आहे. घोड्यावर बसलेल्या युगपुरुषाने डाव्या हाताने लगाम खेचावा आणि त्याचक्षणी घोडा थांबावा, असा देखणा प्रसंग पुतळ्यात दिसतोय. अश्वारूढ पुतळ्यात छत्रपतींच्या उजव्या हातात तलवार तर डाव्या हातात घोड्याचा लगाम असून पुतळा पाहता क्षणी त्यांच्या कर्तृत्वाची झलक दिसते.

गेल्या 50 वर्षांपासून दिमाखात उभा असलेल्या या पुतळ्याच्या निर्मिताचाही एक वेगळा इतिहास आहे. 1970 मध्ये शिवाजी विद्यापीठाचे पहिले कुलगुरु डॉ. आप्पासाहेब पवार यांच्या इच्छेनुसार वर्तमानपत्रांत जाहिरात प्रसिद्ध झाली आहेत. पुणे येथील शिल्पकार बी.आर. खेडकर यांनी बनवलेली प्रतिकृती सर्वांनी आवडली. त्यानुसार इयत्ता दुसरीपर्यंत शिक्षण झालेले आणि विविध ठिकाणी 500 हून अधिक पुतळे उभारण्याचा अनुभव असणाऱ्या खेडकर यांना पुतळा बनवण्यास सांगितल्याचं कुलसचिव डॉ. शिंदे सांगतात.