कित्येक वर्षांनी घडली पंजांची भेट, कोल्हापुरात हिंदू मुस्लिम ऐक्याचे दर्शन, नेमकं काय घडलं?

कोल्हापूर : मोहरम निमित्त कोल्हापुरात अनेक ठिकाणी ताबूत बसवण्यात आले आहेत. त्यात मोहरमच्या सातव्या दिवशी शहरातील अनेक पंजे भेटीला बाहेर पडले होते. तर शहरातील काही महत्त्वाचे पंजे कित्येक वर्षांनी भेटीसाठी बाहेर पडल्याने भर पावसात उत्साही मिरवणुका काढण्यात आल्या होत्या. या मिरवणुका पाहण्यासाठी पावसात देखील भाविकांनी गर्दी केली होती.

पारंपरिक ढोलताशांच्या तालावर थिरकणारी तरुणाई, नेत्रदीपक लाईट इफेक्ट्स, उदाचा दरवळ, त्यातच धो-धो कोसळणाऱ्या पावसात शहरात मोहरमच्या सातव्या दिवशी अनेक पंजांचा भेटीचा सोहळा पार पडला. यामध्ये वर्षानुवर्षांची परंपरा असलेले काही पंजे भेटीसाठी यंदा बाहेर पडले होते. शिवाजी पेठेतील खंडोबा तालीम मंडळाचे पंजे तब्बल 23 वर्षांनी, तर नंगीवली तालीम मंडळाचा पंजा 15 वर्षांनी भेटीला बाहेर पडले होते. बाबूजमाल तालीम मंडळाचा नाल्याहैदर पंजा देखील भेटीला बाहेर पडला होता. तर शहराच्या मुख्य मार्गांवरुन निघालेल्या या मिरवणुका पाहण्यासाठी रात्री उशिरापर्यंत नागरिकांची पावसातही गर्दी पाहायला मिळाली होती.

दरम्यान, मोहरमच्या निमित्ताने नेहमीच कोल्हापुरात हिंदू आणि मुस्लिम बांधवांचे ऋणानुबंध घट्ट होत असल्याचे पाहायला मिळत असते. कोल्हापूरातील सर्वधर्मीय भाविक पंजाच्या दर्शनाला न चुकता जात येतात. पंजाला भरजरी पटके अर्पण करुन नतमस्तक होत असतात. अशाप्रकारे हिंदू-मुस्लिम ऐक्याचे चित्र प्रत्येक पंजा भेटीच्या मिरवणुकीत पाहायला मिळाले.