तुळशीच्या पानावर अन् फळ्यावर खडूच्या साहाय्याने विठ्ठलाची प्रतिमा, कोल्हापूरच्या मायक्रो आर्टिस्टची कमाल

कोल्हापूर : आषाढी एकादशीनिमित्त बरेच जण पंढरपूरच्या वारीसाठी जात असतात. मात्र, कित्येक जणांना पंढरपूरच्या विठ्ठल मंदिरात जाऊन देवाचे दर्शन घेणे शक्य होत नाही. अशावेळी बरेचसे कलाकार आपल्या कलेतून विठ्ठलाप्रती असणारी आपली भक्ती व्यक्त करतात. कोल्हापुरातील एका मायक्रो आर्टिस्टनेही अशाच प्रकारे मायक्रो आर्टच्या माध्यमातून आपली विठ्ठल भक्ती व्यक्त केली आहे.

पेशाने कलाशिक्षक असले तरी आपली कला वेगवेगळ्या पद्धतीने इतरांपर्यंत पोहोचवण्याचे काम कोल्हापुरातील संतोष कांबळे हे करत आले आहेत. कोल्हापूरच्या हातकणंगले तालुक्यातील भादोले गावचे संतोष कांबळे हे पेठ वडगाव येथील बळवंतराव हायस्कूलमध्ये कलाशिक्षक म्हणून कार्यरत आहेत. शाळेत कलाशिक्षक असल्यामुळे फळा आणि खडू यांच्याशी त्यांची रोजच भेट होते. मात्र, याच रंगीत खडू व फळा यांच्या माध्यमातून विविध चित्र कलाकृती साकारून त्यांनी एक कलाकार म्हणून प्रसिद्धी मिळवली आहे.

त्याचबरोबर मोरपिसावर, साबणावर अशा विविध गोष्टींवरही अनेक छोट्या कलाकृती त्यांनी याआधी साकारल्या आहेत. त्यातच आता आषाढी एकादशी निमित्त बोटाच्या पेरा इतक्या आकाराच्या तुळशीच्या पानावर आणि खडू नये फळ्यावर विठ्ठलाची प्रतिकृती साकारली आहे. याद्वारे त्यांनी पांडुरंगाप्रती आपली भक्ती सादर केली आहे.

तर खडूबरोबरच आंघोळीच्या साबणामध्ये, मोरपिसावर, विविध झाडांच्या पानांवर त्यांनी अत्यंत विलोभनीय कलाकृती साकारलेल्या आहेत. तसेच कोणतीही जयंती किंवा पुण्यतिथी असल्यास शाळेच्या फलकावर फक्त खडूच्या साहाय्याने हुबेहूब प्रतिकृती रेखाटण्यात संतोष यांचा हातखंडा आहे.