आजपर्यंत तुम्ही असं झाड कधीच पाहिलं नसेल! कोल्हापुरात दुर्मिळ वृक्षाची चर्चा VIDEO

हा वृक्ष लहान ते मध्यम आकाराचा, काहीसा डेरेदार असून, फांद्या खाली लोंबणाऱ्या असतात. हा वृक्ष 4 ते 6 मीटर, तर काहीवेळा 8 मीटर उंचीपर्यंत वाढतो. खोडाचा व्यास 10 ते 20 सें. मी. इतका असून, साल गुळगुळीत आणि करड्या रंगाची असते. पाने एका आड एक, संयुक्त, हुबेहूब करंजीच्या पानांसारखी दिसतात. पर्णिका सात, हिरव्यागार चकचकीत, अंडाकृती-लंबगोलाकार असतात. फुले द्विलिंगी, अनियमित, पाच ते 6-8 मि. मी. आकाराची, गुलाबी लाल रंगाची, काहीवेळा फिकट जांभळ्या रंगाची, फुले पानांच्या बगलेतून लोंबणाऱ्या तुऱ्यांमध्ये येतात. फळे शेंगवर्गीय असून, शेंगा पाच ते सात सें. मी. लांब, चपट्या असून, फिकट तपकिरी रंगाच्या असतात.