Maharashtra Elections Baramati : युगेंद्रच्या वडिलांच्या शोरुममध्ये पोलिसांची शोध मोहीम, बारामतीमध्ये खळबळ

सोमवारी रात्री युगेंद्र पवार यांच्या वडिलांच्या शोरुममध्ये पोलिसांनी शोध मोहीम राबवली. अजित पवार यांचे बंधू आणि युगेंद्र यांचे वडील श्रीनिवास पवारांच्या शरयू मोटर्सच्या बारामती शोरूम मध्ये रात्री पोलिसांनी मोठं सर्च ॲापरेशन केल. निवडणूकीच्या पार्श्वभूमीवर ही तपासणी करण्यात आली. त्यामुळे मोठी खळबळ उडाली आहे. पोलिसांना या शोरुममध्ये काय सापडलं, नेमकं कोणत्या कारणाने ही शोध मोहीम राबवण्यात आलाी, याची माहिती समोर आली नाही. मात्र, या प्रकरणाची जोरदार चर्चा सुरू झाली आहे.

अजित पवार यांनी शरद पवारांशी फारकत घेतल्यानंतरची ही पहिली विधानसभा निवडणूक आहे. राज्यासह देशाचे लक्ष बारामतीमधील निवडणुकीकडे लागले आहे. शरद पवार यांची साथ सोडल्यानंतर आपण कुटुंबात एकटे पडलो असल्याची खंत अजित पवार यांनी व्यक्त केली होती. अजित पवार आणि त्यांचे कुटुंबीय वगळता पवार कुटुंबातील इतर सगळेजण शरद पवारांसोबत असल्याचे चित्र आहे. श्रीनिवास पवार यांनीदेखील अजित पवारांना विरोध दर्शवला होता.

याबाबत राष्ट्रवादी काँग्रेस शरद पवार गटाचे उमेदवार युगेंद्र पवार यांनी म्हटले की, रात्री 10 वाजण्याच्या सुमारास शो रुम ऑफिसमधून फोन आला. त्यावेळी आपल्याकडे पोलिसांचे एक पथक आले असल्याचे त्यांनी सांगितले. यावर मी पोलिसांना सहकार्य करण्याची सूचना तेथील कर्मचाऱ्यांना दिली. आम्ही काहीच चुकीचं करत नव्हतो, त्यामुळे पोलिसांना काहीच सापडलं नाही. शरद पवारांनी संबोधित केलेल्या सांगता सभेला आलेली गर्दी पाहून काहीजण बिथरले असावेत. पण, बारामतीचं राजकारण या पातळीवर आलं असेल तर दुर्देव असल्याचे युगेंद्र पवारांनी सांगितले.

बारामती येथील शरयू टोयोटा या शोरूम वर रात्री सर्च ऑपरेशन करण्यात आले या संदर्भात बारामती निवडणूक निर्णय अधिकारी वैभव नावडकर यांनी माहिती देताना सांगितले की, यासंदर्भात वेगवेगळ्या ठिकाणी तक्रारी प्राप्त झाल्यानुसार आम्ही या ठिकाणचे सर्च ऑपरेशन केले. या परिसरात कुठल्याही प्रकारची रक्कम मिळून आले नसल्याचे त्यांनी स्पष्ट केले.